Тулгар төрийн 2235, Их Монгол Улсын 820, Үндэсний эрх чөлөө, тусгаар тогтнолоо сэргээн мандуулсны 115, ардын хувьсгалын 105 жил, Ардчилсан хувьсгалын 36 жилийн ой, “Мөнхөд орших Монгол наадам” баяр наадмын нээлт ёслол төгөлдөр боллоо.

Энэ жилийн наадмын нээлтээр бүх үндэстэн ястныг багтааж, улаан цэнхэр утаагаар төрийн далбааг төлөөлүүлж, морин үзүүлбэр, таван морьтой дуучид, газрын зургаа урлан алхах бүжигчдийн хэсэг үзэгчдийг огшоосон юм. 

Наадмын найруулагч Д.Баярбаатар “Өглөө бороотой байсан ч нээлт эхлэхийн өмнө бороо зогсож, наадмын нээлт сайхан боллоо. Бид монголчуудад өвөг дээдээс уламжлагдаж ирсэн үнэт зүйл болох язгуур урлаг, ардын урлагийг байгаль дэлхий, уул ус, газар шороо, монголчуудын аж амьдралыг уран сайхнаар үзүүлэхийг зорьсон. Миний Монголын бүтээсэн өв соёл, уламжлал үнэхээр гайхалтай. Монголын сайхан өв соёл,  уламжлалаа Үндэсний баяр наадам, Цагаан сараар санаж сэргээж, бахархаж байх ёстой.  

Би багийнхандаа сэтгэл хангуулан байна. Үзэгчид үзүүлбэр бүр дээр уухайн түрлэг өргөж буйг харж, сонсох сайхан байлаа. Барга, Дарьганга, Буриадын дуу хуур, бүжиг наадам, хувцас хэрэгсэл их өвөрмөц. Говийн магтаалыг та бүхэн харсан байх. Ямар яруу тансаг, уул усны магтаал юм бэ. Мөн баруун бүсийн бий биелгээ хуур, хөөмий, хувцас хэрэгсэл болон аж байдлыг цогцоор нь уул устай нь магтан дуулсан. Хойд хэсэг буюу Хөвсгөл далай ээжийг магтаж дуулж, цаатан түмний аж байдлыг уран сайхан байдлаар харууллаа. 

Адууны баяртай холбоотойгоор морины үзүүлбэрийг нэлээд оруулсан. Монгол хүн морио хэрхэн унаж эдэлдэг. Монгол морь дэлхийг хэрхэн тамгалж ирснийг харуулахыг зорьсон. Энэ жилийн наадмын нээлтэд 2000 гаруй уран бүтээлч оролцсон. Тэдний 700 гаруй нь бүжигчид. Олон бүжигчид бэлтгэл сургуулилалт хийх гэж маш их хөдөлмөрлөсөн.

Мөн 80 гаруй мориор үзүүлбэр үзүүлсэн. Олон бүжигчинтэй, олон морьт үзүүлбэртэй наадмын нээлт боллоо. Монгол наадмаа үндэсний урлагаараа чимж, гоёх ёстой гэж би боддог. Хамтарч ажилласан багийн хамт олон болон Үндэсний урлагийн их театр, мэргэжлийн бүх байгууллагын хамт олонд талархаж байна” гэлээ.