Францын Ерөнхийлөгч Эммануэль Макрон улсдаа мөрдөгдөж буй хөдөлмөрийн хөлсний доод хэмжээг нэмж, зарим татвар хураамжийн хэмжээг бууруулахаа амлалаа.

Хэдэн долоо хоногийн турш үргэлжилж, сүүлдээ хүчирхийлэл, эмх замбараагүй байдалд хүрч даамжирч байгаа олон нийтийн эсэргүүцлийн ажиллагаанд зориулж тэрбээр энэ мэдэгдлийг хийсэн юм.

Жагсагчид бензины татвар болон өөр бусад бараа бүтээгдэхүүний үнэ нэмэгдэж байгааг эсэргүүцсэн.  Эммануэль Макрон өчигдөр ард түмэндээ хандаж телевизээр хэлсэн үгэндээ "Эсэргүүцлийн ажиллагаанд оролцож байгаа хүмүүсийн уур хилэн, дургүйцлийг олон талаар зөвтгөх шалтгаантай" гэж ярьсан байна.

Улмаар ирэх 2019 оноос Францад хөдөлмөрийн хөлсний доод хэмжээг сарын 100 еврогоор нэмэхээр болсныг мэдэгджээ. Мөн бага орлоготой тэтгэврийн иргэдээс татах татварын хэмжээг нэмэх төлөвлөгөөгөө цуцлаж, илүү цагийн хөлсөнд татвар ногдуулахгүй, ажил олгогчдыг оны төгсгөлд ажилтнууддаа татварын шимтгэлгүй урамшуулал олгохыг дэмжих зэрэг бодлого хэрэгжүүлэхээ зарласан байна.

Харин шинэ ажлын байр бий болгох шаардлагатай байгаа өнөөгийн нөхцөлд чинээлэг иргэдийн татварыг нэмэх нь эдийн засгийг сулруулна хэмээн энэ арга хэмжээнээс татгалзжээ.

Банкны эдийн засагч мэргэжилтэй Эммануэль Макроныг жирийн ард иргэдийн амьдралыг сонирхдоггүй гэж шүүмжлэх нь их байдаг. Түүний өчигдрийн мэдэгдэл харин энэ дүгнэлтийг өөрчлөх оролдлого боллоо гэж ажиглагчид дүгнэж байна.

Эммануэль Макрон бас Францын бүх бүс нутгийн удирдлагуудтай уулзаж, “урьд өмнө болж байгаагүй” хэлэлцүүлэг, санал шүүмжлэл өрнүүлэхээ амлажээ.