Германы парламент Засгийн газрын үйл ажиллагаандаа ашиглах А350-900 загварын гурван шинэ нисэх онгоцыг 1.2 тэрбум еврогоор худалдан авах шийдвэр гаргалаа. Энэ талаар Холбооны Бүгд Найрамдах Герман Улсын Батлан хамгаалах яамны хэвлэлийн албанаас мэдээлж байна.

Батлан хамгаалах яам 15 мянган километрийн нислэг гүйцэтгэх эхний онгоцыг 2020 оны дундуур хүлээн авна. Үлдсэн хоёр онгоцыг хоёр жилийн дараа авах юм байна. 

Германы Засгийн газарт онгоцны асуудлаас болж айлчлал, нислэг саатах цөөнгүй тохиолдол гарсан. 2018 оны сүүлчээс хойш Германы Засгийн газрын гишүүдийн дор хаяж долоон албан ёсны айлчлал онгоцны техникийн асуудлаас болж саатжээ.

Тухайлбал, энэ сарын 9-нд Засгийн газрын А340 Конрад Аденауэр онгоц Кельнд газардах үеэрээ дугуйных нь бүрээс хагарснаас болж Сангийн сайд Олаф Шольц нь энэ сарын 11-нд АНУ-д болсон Олон улсын валютын сангийн хуралд өөр онгоцонд сууж явахаас өөр аргагүй болсон байна. 

Үүнээс долоо хоногийн өмнө Германы Гадаад хэргийн сайд Хайко Маасын сууж явсан энэ онгоц Нью-Йоркт газардах үеэр дугуйных нь бүрээс мөн л хагарсан юм. Өнгөрсөн хоёрдугаар сард Засгийн газрын А319 “Эбус” онгоцны дугуйн гидравлик системд нь доголдол гарснаас болж Гадаад хэргийн сайд Хайко Маас Малид байх хугацаагаа сунгахаас өөр аргагүй болсон.

Мөн Германы Эдийн засгийн хамтын ажиллагаа, хөгжлийн асуудал эрхэлсэн сайд Герд Мюллер Засгийн газрын онгоцонд гарсан асуудлаасаа болж Африкийн орнуудад хийх айлчлалын хөтөлбөрөө цуцлахад хүрчээ. Түүнчлэн ХБНГУ-ын Холбооны Ерөнхийлөгч Франк-Вальтер Штайнмайер өнгөрсөн нэгдүгээр сард Засгийн газрын онгоцны техникийн доголдлын улмаас Этиопоос хуваарьт хугацаандаа нисч ирж чадаагүй бол 2018 оны 11 дүгээр сард Буэнос-Айрест болсон “Их-20”-ийн уулзалтад оролцохоор зорьж явсан Германы канцлер Ангела Меркелийн онгоц цахилгааны системд нь саатал гарч, үүнээс болж дээд хэмжээний уулзалтын нээлтийг таслахад хүрсэн юм.