Шууд Chart

“Берлиний агаарын гүүрийн түүхээс” хүүхдийн бүжгэн жүжиг энэ сарын 18-нд тоглогдоно

2019-05-15 09:52:21

“Берлиний агаарын гүүрийн түүхээс” хүүхдийн бүжгэн жүжгийн төслийг энэ сарын 6-18-нд Улаанбаатар хотноо хэрэгжүүлж байна.

Монгол Улс, ХБНГУ-ын хооронд дипломат харилцаа тогтоосны 45, Герман Улс нэгдсэний 30, Берлиний агаарын гүүрийн 70 жилийн ойн хүрээнд Монгол Улсын Соёлын Элч О.Оюунтуяагийн санаачлагаар хоёр орны соёл, урлаг, боловсрол, нийгмийн найрсаг хамтын ажиллагааг өргөжүүлэн хөгжүүлэх зорилгоор энэхүү төсөл хэрэгжинэ.

Ингэхдээ Монголын урлагийн зөвлөл, Соёл, урлаг, хэвлэл мэдээллийн төслийн менежмент, зөвлөгөө ТББ, Freundeskreis der Jugendkunstschule Charlottenburg-Wilmersdorf e.V. хамтран, албан түнш Монгол Улс дахь ХБНГУ-ын ЭСЯ ба ХБНГУ-ын Гадаад Харилцааны Яам, ПАШ-Түнш сургуулиудын хөтөлбөр, Конрад Аденауэр сангийн дэмжлэгтэйгээр хэрэгжих аж.

Төслийн зорилго нь орчин үеийн бүжгээр дамжуулан хүүхэд залуучуудад урлаг, гоо зүйн боловсрол олгох, дэлхийн түүхээс суралцах боломжийг олгох замаар хоёр орны хэл, урлаг, соёлын хамтын ажиллагааг бэхжүүлэхэд оршино.

“Берлиний агаарын гүүрийн түүхээс” бүжгэн жүжигт дэлхийн түүхийн нэгээхэн хэсэг болох 1948-1949 оны хүйтэн дайны үед Барууны холбоотнууд Баруун Германы бүслэгдсэн ард иргэдэд агаарын замаар хоол, хүнсний тусламж үзүүлж, олон мянган иргэдийг аварсан найрамдалт, нөхөрсөг хамтын ажиллагааг орчин үеийн бүжгийн элемент, хөгжмийн хэмнэлээр түүхэн үйл явдлыг дүрслэн илэрхийлэх богино хугацааны сургалтанд сурагчид хамрагдан тайзнаа амилуулж буйгаараа онцлог юм.

Төслийн хүрээнд ХБНГУ-ын “Faster-Than-Light-Dance” бүжгийн компаний уран сайхны удирдаач, бүжиг дэглээч, ХБНГУ-н төрийн соёрхолт Фолкер Айзенахын удирдлага дор ПАШ-Түнш сургуулиудын хөтөлбөрийн хамтрагч Улаанбаатар хотын ЕБС болон СУИС-ийн “Бадмаараг” ахлах сургуулийн нийт 34 сурагч 10 хоногийн турш орчин үеийн бүжгийн эрчимжүүлсэн сургалтанд хамрагдана.

Сургалтын үр дүнд уран сайхны удирдаач Фолкер Айзенахын дэглэсэн “Берлиний агаарын гүүрийн түүхээс” бүжгэн жүжгийг энэ сарын 18-нд “Улаанбаатар” чуулгын тайзнаа олон нийтэд нээлттэй толилуулах юм байна.

Нийтэлсэн: У.Баярсайхан

“Берлиний агаарын гүүрийн түүхээс” хүүхдийн бүжгэн жүжиг энэ сарын 18-нд тоглогдоно   
Үзсэн: 546 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй