Сүрьеэгийн вакцин туршсан улс орнуудад коронавирусний халдвараар нас барагсдын тоо 6 дахин цөөн байна гэсэн судалгааны дүн гарчээ. Сүрьеэ өвчнөөс сэргийлэх "Бациллус Калметте-Герин" гэдэг вакциныг коронавирусний халдварын эсрэг туршиж байгаа орнуудад энэ өвчнөөр нас барагсдын тоо бусад улс орнуудынхаас бараг 6 дахин бага байна гэж Америкийн Жон Хопкинсын их сургуулийн эрдэмтэд дүгнэсэн байна.

Ингэхдээ бүрэн батлагдаагүй байгаа уг дүгнэлтэд сүрьеэгийн вакциныг туршсан болон туршаагүй улс орнуудыг эдийн засгийн хувьд ангилж, судалгааны үр дүнг харьцуулжээ. Тодруулбал, вакциныг туршаагүй бага орлоготой улс орнуудад "COVID-19" халдварын эндэгдлийн түвшин 1 сая хүнд 0.4 хувьтай байсан бол, дунд болон өндөр орлоготой улсуудынх 0.65 болон 5.5 хувьтай байсан гэнэ. Харин "Бациллус Калметте-Герин" вакцин хийсэн улсуудын хувьд 1 сая хүн тутамд тохиолдох нас баралтын түвшин үүнээс 5.8 дахин бага байсан гэжээ.

100 жилийн өмнө гаргаж авсан уг вакцин бактерийн гаралтай сүрьеэгийн халдварыг эсэргүүцэх дархлааны тогтолцоог дэмждэг гэдэг боловч вирус зэрэг өөр бусад эмгэг төрүүлэгчээр үүссэн халдварын эсрэг ач холбогдолтой гэсэн судалгаанууд гарсныг ч хэвллэлүүд мэдээлж байсан юм.

Гэхдээ одоогоор үүнийг зөвхөн туршилтаар ашиглаж, сүрьеэгийн вакцин хүний бие коронавирусний халдвараас өөрийгөө хамгаалах дархлааг сайжруулдаг эсэхийг тогтоохоор эрдэмтэд ажиллаж байгааг Британийн "Дэйли Мэйл" сонины цахим хуудсанд сануулжээ. Өнгөрөгч гуравдугаар сард л гэхэд Нидерландаас гадна Австралийн дөрвөн мянган эмч, эмнэлгийн ажилтанд сүрьеэгийн энэ вакциныг туршиж эхэлжээ.