Дэлхийн хоёрдогч том эдийн засагтай улс болох БНХАУ-ын эдийн засгийн өсөлт саарч байгаа нь бүс нутгийн эдийн засагч сөрөгөөр нөлөөлж байна хэмээн Азийн хөгжлийн банкны шинжээчид дүгнэжээ. Учир нь Ази бүсийн эдийн засгийн үзүүлэлт таамаглаж байсан хэмжээндээ хүрч чадаагүй байна.

Ази бүс нутгийн эдийн засгийн өсөлт шинжээчдийн урьдчилан тооцоолж байснаас буурсан үзүүлэлттэй гарчээ. Өөрөөр хэлбэл шинжээчид өнгөрсөн 4-р сард тус бүсийн 45 орны эдийн засгийн үзүүлэлтийг  6.6 хувь хэмээн тооцоолж байсан бол энэ үзүүлэлт 6.3 хувь болон буурчээ. Эдийн засгийн үзүүлэлт буурах болсон гол шалтгааныг БНХАУ-ын эдийн засгийн өсөлтийн удааширалтай холбоотой хэмээн тайлбарлаж байна. Зүүн өмнөд Хятадын эдийн засгийн өсөлт хэвийн байгаа боловч Хятад улсын хэмжээнд эдийн засаг бүхэлдээ саарч байгаа нь ийнхүү бүс нутгийн хэмжээнд хүртэл нөлөөлж эхэлжээ.

Худалдааны эргэлт удааширсан үзүүлэлтээс үүдэн Хятадын 2013 оны эдийн засгийн өсөлт өнгөрсөн 4 сард 8.2 хувь гэж таамаглаж байсан ч 6 сарын байдлаар 7.7 хувь болж буурсан байна. Гэхдээ Хятад улсад ийм зэргийн эдийн засгийн өсөлтийн удааширалыг тус улсын удирдлага ирээдүйд тоомохон өсөлтийг авчрахын тулд бодлогоор хэрэгжүүлсэн хэмээн дүгнэж байгаа эдийн засагчид байгаа юм.