Япон улсын ерөнхий сайд Кишида Фумио, Францын ерөнхийлөгч Эммануэль Макрон нар хүнс болон эрчим хүчний бэрхшээлтэй тулгараад байгаа улс орнуудад туслахад хамтран ажиллахаар тохирчээ. Хоёр удирдагч лхагва гарагт утсаар ярих үеэрээ  Орос, Украины нөхцөл байдал болон Энэтхэг номхон далайд чөлөөт, нээлттэй бүс бий болгох зэрэг асуудлыг хэлэлцсэн тухай NHK мэдээллээ.

Энэ үеэр Японы ерөнхий сайд Орос Украинд довтолсонтой холбоотой үүсээд байгаа нөхцөл байдлын тухайд хамтын ажиллагаагаа цаашид үргэлжлүүлэх, хууль ёсыг иш үндэс болгосон олон улсын дэг журмыг сахиулахын төлөө байгаа байр сууриа батлан илэрхийлжээ.

Түүний хариуд Макрон үндэсний аюулгүй байдал, эдийн засаг, бусад салбарт Япон улстай хамтын ажиллагаагаа өргөжүүлэх сонирхолтой байгаагаа хэлсэн байна.

Хоёр удирдагчид түүнчлэн, Их 7-ийн бүлгийн орнууд Оросын эсрэг хориг тогтоох, Украинд тусламж үзүүлэх тал дээр хамтран ажиллах нь зүйтэй гэж санал нэгджээ. Кишида, Украинд үүссэн нөхцөл байдалд хамтран ажиллахыг Азийн улс орнуудын удирдагчдад хандан уриалснаа энэ үеэр мөн мэдэгдлээ.