Шинэ Зеланд улс 2009 оны 1-р сарын 1-нээс хойш төрсөн хүмүүст тамхи худалдахыг хориглосон хуулийн төслийг мягмар гарагт баталсан байна. Ирээдүй хойч үеэ тамхидалтаас урьдчилан сэргийлэх зорилготой энэхүү хориг нь 2025 он гэхэд улс орноо “тамхинаас ангижирсан улс” болгох Засгийн газрын өргөн хүрээтэй зорилтын нэг хэсэг юм.

Энэ хуулиар, залуучуудыг тамхи худалдан авахыг насаар нь хориглох замаар тамхинаас гаргаж тамхигүй ирээдүйг бий болгохыг зорьж байна. Шинэ Зеландын ЗГ-ын өнгөрсөн 11-р сард гаргасан статистик мэдээгээр, тус улсад тамхидалт хэдийн түүхэн доод түвшиндээ хүрч буурсан нь дэлхийд хамгийн бага хэмжээнд тооцогдож байна. Өнгөрсөн жилийн 11-р сард тус улсын насанд хүрэгчдийн 9.4 хувь өдөр бүр тамхи татдаг гэсэн үзүүлэлт гарч байсан бол энэ жилийн 11-р сард ердөө 8% нь байнга тамхи татдаг гэсэн буурсан дүн гарсныг БиБиСи мэдээндээ дурджээ. Өнгөрсөн жил 56,000 тамхинаас татгалзсан гэж тус улсын эрүүл мэндийн яамны мэдээлснийг СиЭнЭн уламжилсан байна.

Тамхигүй орчны тухай хуулийн төслөөр 2025 он гэхэд үндэсний хэмжээнд тамхи татах зуршилтай хүмүүсийн хүн амд эзлэх хувийг таван хувь хүртэл буруулах, цаашид тэглэх зорилт тавиад байна. Тамхины тухай хуулийн дагуу,  2023 оны эцэс гэхэд тамхи зарах цэгийн тоог хязгаарлаж, тамхи зарах зөвшөөрөл бүхий 6000 дэлгүүрийг 600 хүртэл бууруулахаар болжээ. Мөн тамхины донтолтыг бууруулахын тулд бүтээгдэхүүн дэх никотины хэмжээг бууруулахаар төлөвлөсөн байна. Шинэ хуулийг зөрчсөн тохиолдолд ойролцоогоор 96,000 америк доллар хүртэл торгууль ногдуулахаар болжээ.