Оросын пуужингууд болон нисгэгчгүй онгоцуудаас хамгаалахад нь дэм болгох үүднээс АНУ Украинд пуужингаас хамгаалах “Пэтриот” системээ нийлүүлэхээр төлөвлөж байгаа мэдээлэл байна. Вашингтон энэ тухайд эцсийн шийдвэрээ энэ 7 хоногийн пүрэв гарагт багтаан мэдээлж магадгүй талаар мэдээллийн агентлагууд америкийн засгийн газрын эх сурвалжуудаас иш татан мэдээлжээ. Оросын эрх баригчид харин НАТО-г Украинд пуужингаас хамгаалах систем нийлүүлэхээс эрс сэрэмжлүүлдэг.

Өвлийн хүйтэнд эрчим хүчний дэд бүтцийг нь сүйрүүлж, олон сая хүнийг цахилгаан дулаангүй болгож байгаа оросын дайралтуудыг няцаах илүү хүчтэй зэвсэг шуурхай журмаар шийдвэрлэж өгөх хүсэлтийг Киевийн талаас тавьдаг. Хамгийн сүүлд саяны даваа гарагт Украины ерөнхийлөгч Володимир Зеленский 7-ийн бүлгийн удирдагчидтай цахим уулзалтын үеэр, сая сая иргэдийг нь гэрэл цахилгаан, ус дулаангүй болгож байгаа оросын дайралтуудыг няцаахын тулд улсад нь сүүлийн үеийн өндөр нарийвчлал бүхий зэвсгийн системүүд нийлүүлэхийг уриалсан. “Пэтриот” систем илгээх нөхцөлд Өрнөдөөс Украинд нийлүүлсэн хамгийн сүүлийн үеийн “газар-агаар” ангиллын пуужингийн систем болох юм. Ийм системийг Украинд нийлүүлэх нөхцөлд Москва хариу үйлдэл хийж, хямрал улам даамжирна гэдэг үүднээс АНУ-ын албаныхан урьд нь татгалзах байр суурь баримталж ирсэн. Дээрээс нь “Пэтриот” системийг ажиллуулахад чамгүй бэлтгэлжилт шаардлагатай учраас америкийн цэргийнхний оролцоо тулгарч болзошгүй гэдэг болгоомжлол байдаг. Харин Пентагоны хэвлэлийн төлөөлөгчийн өчигдөр мэдээлснээр, ХАЙМАРС мэтийн өндөр нарийвчлалтай зэвсэг Украинд нийлүүлэхэд тулгардаг энэ асуудлыг шийдэхийн тулд АНУ одоогийн байдлаар, Герман зэрэг европын орнуудад Украины цэргүүдийг сургаж байгаа юм байна. “Пэтриот” систем нь баллистик болон далавчит пуужингууд амдан сөнөөх зориулалттай пуужингууд болон өндөр чадамж бүхий радарын төхөөрөмжөөр тоноглогдсон зенитийн пуужингийн цогцолбор.

Ийм системийг НАТО-гийн орнуудаас Киевт нийлүүлсэн нөхцөлд Оросын зэвсэгт хүчин түүнийг бие бүрэлдэхүүнийх нь хамтаар нэн устгахыг Оросын аюулгүй байдлын зөвлөлийн орлогч дарга Дмитрий Медведев Өнгөрсөн сард анхааруулж мэдэгдэл хийж байжээ. Ийнхүү өвлийн тэсгим хүйтэнд гэрэл цахилгаан, дулаан, усан хангамжгүй нөхцөлд сая сая Украин иргэд амьд үлдэхийн төлөө тэмцэлдэж байна. Үүний зэрэгцээ Парист чуулсан Украинд хандивлагчдын уулзалтаас 70 гаруй улс болон байгууллага Оросын дайралтад өртөөд буй Украины ус, хүнс, эрчим хүч, эрүүл мэндийн систем болон тээврийн дэд бүтцүүдийг дэд бүтцүүдийг сэргээн босгоход 1 тэрбум гаруй евро олгох амлалт өгснийг Францын Ерөнхий сайд Кэтрин Колонна мэдэгдсэн.