Европын холбоо болон АСЕАН-ы хооронд эдийн засгийн холбоо харилцаагаа гүнзгийрүүлэх асуудлаар өнөөдөр анх удаа дээд хэмжээний уулзалт хийж байна. Брюссельд болж байгаа энэ уулзалтаар, “ногоон” болон тоон эдийн засагт шилжих шилжилт, эрүүл мэнд, худалдаа зэрэг бүс нутаг хоорондын хамтын ажиллагааны олон чиглэлээр яриа хэлэлцүүлэг өрнөж байгаа юм байна.

Европын холбооны гишүүн 27 улс болон Зүүн өмнөд Азийн улсуудын холбоо АСЕАН-ы гишүүн 10 улсын 9-ийнх нь удирдагчид оролцож байгаа энэ чуулга уулзалт бүс нутгийн 2 байгууллага хооронд дипломат харилцаа тогтоосны 45 жилийн ойг тохиолдуулан болж байгаа онцлогтой байна. АСЕАН-ы гишүүдээс, цэргийн хунтын дэглэм ноёрхож байгаа Мьянмарыг энэ чуулга уулзалтад оролцуулаагүй байна. Хоёр байгууллага хооронд нисэх компаниудын үйлчилгээг өргөжүүлэх ажлыг хөнгөвчлөх хэлэлцээр хэдийн байгуулагджээ. АСЕАН-ы орнуудад хэрэгжүүлэх төслүүдэд 2027 оноос өмнө нийт Европын сангаас 10 тэрбум еврогийн хөрөнгө оруулалт хуваарилахаар Европын комиссын дарга Урсула фон дер Ляйен төлөвлөж байна. Сэргээгдэх эрчим хүч болон тогтвортой ХАА-г хөгжүүлэх салбарын хөрөнгө оруулалт энд багтжээ. Хятадын нөлөө улам бүр тэлж байгаа энэ бүс нутгийн тухайд, “хөрөнгө оруулалтын эх үүсвэрүүдээ төрөлжүүлэх, найдвартай түншлэл бий болгох эрэлт өндөр байгаа нь харагдаж байна” гэж ЕХ-ны төлөөлөгч ярьжээ. Энэ хүрээнд ЕХ тухайлбал, Сингапур, Вьетнам зэрэг улсуудтай ганцаарчлан байгуулсан худалдааны хэлэлцээрээ өргөжүүлэх сонирхолтой байгаа юм байна. Харилцан бие биеийнхээ худалдааны гуравдах томоохон түнш гэж тооцогддог бүс нутгийн энэ хоёр байгууллага олон улсын дэг журам тал дээр мөн нэгдмэл байр суурь илэрхийлж магадгүй байна.

Энэ хүрээнд ЕХ-ны зүгээс Оросын зүгээс түрэмгийлэл үйлдэж байна гэдэг томьёоллоор Украины дайны асуудлаар хамтарсан мэдэгдэл батлах сонирхолтой байгаа юм байна. Амаргүй боловч энэ томьёоллоор мэдэгдэл батлах төлөв нааштай харагдаж байгаа талаар ЕХ-ны төлөөлөгч ярьсан байна. Сингапурын тухайд Оросын эсрэг хоригт нэгдсэн орны тоонд ордог. Харин Лаос, Тайланд болон Вьетнам улсууд өнгөрсөн 10 сард НҮБ-д болсон Украины дөрвөн мужийг Орос өөртөө нэгтгэснийг буруутгасан тогтоолын төслөөр санал хураахад түдгэлзсэн байдаг. Үүний өмнө Индонезид чуулсан Хорийн бүлгийн дээд хэмжээний уулзалтаас, оролцогч улс орнуудын дийлэнх нь “Украины дайныг” зэмлэн буруутгаж байна гэдэг томьёоллыг дэмжиж байсан юм.