Туркийн инфляцын түвшин энэ эцэст 66,80 хувьтай гарахаар байгааг тус улсын Төв банк мэдээлжээ. Санхүүгийн зах зээлд оролцогчдын дунд явуулсан асуулгын дүнг үндэслэж энэ үзүүлэлтийг гаргасан гэж мэдээлж байна. Өмнө нь тэд энэ хувийг 68,06 хувьд байхаар тооцоолж байжээ.

Оны эцсийн дүнгээр улсынх нь инфляц 65,2 хувийн түвшинд гарах төлөвийг Туркийн Төв банкны тэргүүн Шахап Кавжиоглу энэ сарын эхэнд зарлаж байжээ. Харин Инфляцад анализ хийдэг бие даасан судлаачид Туркийн инфляцыг 170,7 хувьтай байна гэж дүгнэж байна. Туркийн эрх баригчид өнгөрсөн оны 12-р сараас хойш туркийн үндэсний мөнгөн тэмдэг лирийн ханшийг дэмжихэд чиглэсэн эдийн засгийн шинэ бодлого явуулж байгаа. Гэвч оны эхнээс хойш тус улсын мөнгөн тэмдэгтийн ханш 25 гаруй хувиар унажээ. Өнгөрсөн оны сүүлээс энэ оны 8-р сарыг хүртэл бодлогын хүүгээ 14 хувьд барьж байсан Туркийн төв банк түүнээс хойш бодлогын хүүгээ аажим сулруулж, одоо 10,5 хувьд байна.

Туркийн ерөнхийлөгч Эрдоган зээлийн хүү өндөр байснаар үнийн өсөлтийг гааруулна гэж мэдэгддэг бол, дийлэнх эдийн засагчид хүүг өсгөх нь инфляцын эсрэг уламжлалт ерөндөг болохыг сануулж байна. Ийнхүү асар өндөр инфляцаас үүдэлтэйгээр Туркт үл хөдлөх хөрөнгийн хямрал газар авчээ. Түрээсийн болон худалдах байр орон сууцны үнэ тэнгэрт хадаж, өдрийн хоол хүнс, цахилгаан бусад зардлаа арайхийн залгуулдаг цалин багатай олон сая хүний байдал хүндхэн болоод байна. Боломжтой зарим нэг нь хүү багатай банкны хадгаламжаа цуцалж үл хөдлөх хөрөнгө худалдаж авах болсноор байдлыг улам даамжруулж байна. Оны эхнээс хойш туркийн мөнгөн тэмдэгт лирийн ам.доллартой харьцах ханш 28 орчим хувиар суларсныг далимдуулж, гадаадын худалдан авагчид мөн туркийн үл хөдлөх хөрөнгийн зах зээлд хүч түрэн орж ирж байгаа юм байна.