Твиттер болон бусад нийгмийн сүлжээний талаар бичдэг хэд хэдэн сэтгүүлчийн хаягийг хаасан Илон Маскийн шийдвэрийн улмаас тус нийгмийн сүлжээ болон түүнийг ашиглан мэдээ нийтлэлээ түгээдэг хэвлэл мэдээллийн байгууллагууд хооронд ан цав үүсэх нөхцөл бүрджээ. Нью-Йорк таймс, Вашингтон пост, Си-Эн-Эн, Америкийн дуу хоолой зэрэг америкийн томоохон хэвлэлүүдийн сэтгүүлч сурвалжлагчдын Твиттер дэх хаягийг пүрэв гарагт гэнэт хаасан юм байна.

Энд өртсөн “Бизнес инсайдер” сэтгүүлийн тоймч гэхэд, баасан гарагт ч гэсэн хаяг нь хаалттай хэвээр байсныг нотолж байна. Энэ тоймчийн тухайд, 2018-2021 оны хооронд Тесла компанийн үйлдвэрлэл дэх “аюултай” гэж үзэх хэмжээний алдаа дутагдлуудын талаар цуврал нийтлэл бичиж байжээ. Илон Маск, нээлтэй мэдээллийн эх сурвалжууд ашиглаж хувийн онгоцных нь нислэгийг автоматаар мөшгөдөг хаягуудыг бүрмөсөн хаах шийдвэрээ лхагва гарагт зарласны дараахан ийнхүү сэтгүүлчдийн хаягууд устжээ. Тэрчлэн өөр хүний одоо байгаа байршлын талаарх мэдээллийг өөрийнх нь зөвшөөрөлгүйгээр бусдад дамжуулахыг бүх хэрэглэгчдэд хориглох дүрмийн өөрчлөлтийг Твиттер-т нэвтрүүлсэн байна. Сэтгүүлчдийн хаягийг хаасан нь олон нийтийн мэдээллийн хэрэгслүүдэд аюулын харанга дэлдээд зогсохгүй, НҮБ ч бас энэ асуудалд анхаарал хандууллаа. Үүнээс үүдэн тус байгууллага Твиттерийн орон зайг ашиглах эсэхээ эргэж харж мэдэхээр  байна гэж “Ассошиэйтэд пресс”-ийн мэдээнд дурджээ. “Дэлхий даяар сэтгүүлчид хориг хаалт, бие махбодод нь халдах сүрдүүлэг, түүнээс ч дор нөхцөл байдалтай тулгардаг өнөөгийн нөхцөлд энэ нь аюултай жишиг тогтоож байна” гэж  НҮБ-ын албан ёсны төлөөлөгч Стефан Дюжаррик хэлжээ. Өнгөрөгч 10-р сард Илон Маск “Твиттер”-ийг худалдаж авсны дараагаас контент идэвхжүүлэлттэй холбоотой асуудлаас болж зар сурталчилгааны олон компани Твиттер”-ээс татгалзсан. Одоо харин тус платформын хамгийн идэвхтэй хэсгийн нэг хэвлэл мэдээллийн байгууллагуудтай  тангараг тасарч мэдэхээр нөхцөл үүссэнийг “Ассошиэйтэд пресс” мэдээлжээ.