Өнгөрсөн долоо хоногт Их Британийн төмөр замын салбарын ажилчид ажил хаялт зарласнаар Лондонгийн хамгийн ачаалалтай нисэх онгоцны буудлуудад асуудал үүсэж аялагчид цагтаа очиж чадалгүй нислэгээсээ хоцорч, зарим нь нэлээд хэмжээний саад бэрхшээлтэй тулгаран нисэх буудалд очсоноо хуваалцлаа. Төмөр зам, тэнгисийн тээврийн холбооны гишүүд ажил хаялт зарласны улмаас баасан гарагт Их Британид галт тэрэгний хөдөлгөөний 50 хувь нь саатжээ.

Баасан гарагийн ажил хаялт нь Төмөр зам, тэнгисийн тээврийн үйлдвэрчний эвлэлийн энэ долоо хоногт хоёр удаа хийсэн 48 цагийн ажил хаялтын нэгээхэн хэсэг бөгөөд Мягмар, Лхагва гарагт ихэнх үйлчилгээгээ цуцалж, мөн Баасан, Бямба гарагт дахин ажил хаяж буйгаа зарласан байна. Үйлдвэрчний эвлэлүүд төмөр замын сүлжээг удирддаг Network Rail болон галт тэрэгний 14 компаниас тавьсан цалин хөлс, хөдөлмөрийн нөхцөлийн талаарх хамгийн сүүлийн үеийн саналд татгалзсаны улмаас ийнхүү ажил хаялт зарлахад хүрсэн байна. Үүнтэй холбоотойгоор ихээхэн ачаалалтай байдаг Лондон хотын тээвэрт ачаалал үүсэж ялангуяа нисэх онгоцны буудалд хүрэх гэсэн гадаад дотоодын аялагчид хүндхэн байдалд ороод буйгаа хуваалцжээ.

Тухайлбал Лондонгийн Гатвик нисэх онгоцны буудлын хойд терминалд ирсэн зорчигчид ажил хаялтад бухимдаж байгаагаа илэрхийллээ.

Нэгэн аялагч бүсгүй нисэх онгоцны буудалд ирэхэд "Аймшигтай"байлаа гэж тодорхойлсон бол өөр нэгэн аялагч "Бага зэрэг хэцүү байсан. Бид галт тэрэгний оронд тусгай шугамын автобус сонгож, нэгээс нөгөөд дамжин суусаар ирлээ" гэж ярьжээ. Хилийн чанадаас ирсэн аялагчид нислэгтээ амжихын тулд Лондонгийн төвөөс явахад нэлээд бэрхшээлтэй тулгарч байгаа юм байна. Мөн нэгэн аялагч "Лондон шиг хөл хөдөлгөөн ихтэй хотод энэ нь үнэхээр томоохон асуудал бөгөөд нийгмийн амьдрал үргэлжлэхэд ихээхэн саад учруулж байна" гэж хэлжээ.

Энэ долоо хоногт нийт 4 өдрийн ажил хаялт болж байгаа бөгөөд Ням гаригт мөн 5 дахь өдрөө үргэлжлэхээр байгааг Би БИ Си мэдээлэлдээ хүргэсэн байна. Ажил хаялтад их Британийн 20,000 галт тэрэгний жолооч, засвар үйлчилгээний ажилчдын төлөөлөл оролцож байгаа юм байна.