Герман улсын байгалийн шингэрүүлсэн хийн анхны терминал бямба гарагт Хойд тэнгисийн Вильгельмшавен боомт хотод албан ёсоор нээлтээ хийсэн байна. Канцлер Олаф Шольц тус шинэ терминалд зочлон энэхүү байгууламж нь ОХУ-аас эрчим хүчний хараат бус байдлыг бий болгох чухал үе шат болохыг онцолжээ.

Германы Канцлер Олаф Шольц нээлтийн ёслол дээр үг хэлэхдээ, уг байгууламжийг нээснээр улс орны аюулгүй байдалд маш чухал хувь нэмэр оруулж байгааг онцлон тэмдэглэсэн байна. Тэрээр уг байгууламжийн бүтээн байгуулалтын хурдыг онцолж, энэ нь Европын хамгийн том эдийн засаг хүчирхэг хэвээр байх болно гэдгийг харуулж байна гэж хэлсэн байна. Шольц 2-р сард Орос Украинд довтолсны дараа анхны байгалийн шингэрүүлсэн хийн терминалуудыг барихаар төлөвлөж байгаагаа зарлаж байсан юм. Албаныхан тус байгууламж нь нэгдүгээр сард тогтмол үйл ажиллагаагаа явуулж эхлэх төлөвтэй байгааг мэдэгджээ. Орос Украин руу довтлохоос өмнө Германы байгалийн хийн импортын 55 хувийг Орос бүрдүүлдэг байсан бол ОХУ наймдугаар сарын сүүлчээс хойш Герман руу байгалийн хий нийлүүлэхээ зогсоосон байна.

Иймд Оросын нийлүүлэлтийг орлох байгалийн хийн өөр эх үүсвэртэй болохын тулд Герман улс ирэх онд тус улс бусад бүс нутагтаа үүнтэй ижил төстэй үйлдвэрүүдийн үйл ажиллагааг эхлүүлэх төлөвтэй байгааг эн-эйч-кэй мэдээндээ дурджээ. Энэ өвөл дахин хоёр терминал ашиглалтад орохоор төлөвлөж байгаа бол ирэх өвөл гурван терминалыг нээх төлөвтэй байна.