Австралийн гадаад хэргийн сайд Пенни Вон Австрали, Хятадын дипломат харилцааны 50 жилийн ойн хүрээнд Хятадын засгийн газрын урилгаар энэ 7 хоногт Бээжинд айлчлахаар болжээ. Австралийн гадаад хэргийн сайдын айлчлалаар 2018 оноос хойш завсарласан Австрали-Хятадын гадаад хэрэг, стратегийн яриа хэлэлцээг хийхээр төлөвлөсөн байна.

Австралийн ерөнхий сайд Энтони Албаниз, Хятадын дарга Ши Жиньпин нар өнгөрсөн сард Балид болсон Хорийн бүлгийн дээд хэмжээний уулзалтын хүрээнд уулзсан юм. Энэ бол олон жил худалдаа эдийн засгийн маргаантай байгаа хоёр орны төр засгийн тэргүүн нарын 6жилийн дараа хийсэн анхны албан ёсны уулзалт байсан. Пенни Воны Ван И-тэй хийх хэлэлцээний гол сэдэв хоёр орны худалдааг сэргээх тухай асуудал байх юм байна. Австрали улс 2020 оноос хойш тавьсан эдийн засгийн хоригоо цуцлахыг Хятадад олон жил шахалт үзүүлж шаардлага тавьж ирсэн. Австрали улс Хятадтай тогтвортой харилцаатай байхыг эрмэлзэж ирсэн, бид боломжит салбартаа хамтарч, зарим салбарт санал зөрөлдөж, үндэсний эрх ашгийнхаа төлөө ажиллах болно гэж Австралийн засгийн газрын мэдэгдэлд онцолжээ.

Харин Бээжин энэ айлчлал Балигийн дээд уулзалтын үр дүнг ахиулах, харилцаагаа сайжруулах алхмыг улам урагшлуулна гэдэгт итгэж байгаагаа илэрхийлж байна. Австрали улс цар тахлын уг гарлыг шалгах олон улсын мөрдөн шалгалтыг Хятадад явуулахыг дэмжсэнээс болж Бээжин Канберрад худалдааны хориг саад тавьсан. Хятад Австралийн импортын хэд хэдэн бараа бүтээгдэхүүнд хориг тавьж, заримд нь импортын өндөр татвар ноогдуулсан. Тухайлбал Австралийн арвай, дарс, үхрийн мах, хөвөн, нүүрс зэрэг бүтээгдэхүүнийг импортлохоо больсон. Хятад улс нь Австралийн худалдааны хамгийн том түнш нь. Иймээс энэ хориг Австралийн эдийн засагт хохиролтой тусаж байгааг эдийн засагчид онцолж байгаа юм.