НҮБ-ын Биологийн олон янз байдлын тухай конвенцод оролцогч талуудын 15 дугаар бага хурлын төгсгөлд 2030 он гэхэд хүрэх шинэ зорилтуудыг тусгасан гэрээг баталжээ. Энэ гэрээ нь олон мянган амьтан, ургамлын төрөл зүйлийг устаж үгүй болохоос урьдчилан сэргийлэх зорилготой. Энэ бол газар нутаг, далай тэнгисийг хамгаалах олон улсын хамгийн чухал хүчин чармайлт учраас түүхэн гэрээ гэж бага хурлын төлөөлөгчид тодорхойлжээ.  

НҮБ-ын Биологийн олон янз байдлын тухай конвенцод оролцогч талуудын 15 дугаар бага хурал энэ сарын 7-нд Канадын Монтреал хотноо эхэлсэн. Үндсэн зорилго мөхлийн ирмэг дээр байгаа амьтдын тоо толгойг сэргээх, зэрлэг амьтдыг хамгаалах, хуурай газар, далайн тэнгисийн ядаж 30 хувийг хамгаалах зорилтыг бүх нийтээрээ хэрэгжүүлэхээр тохирч, гэрээ болгон батлахад чиглэсэн юм. Энэ гэрээний хамгийн гол ач холбогдол бол биологийн олон янз байдалд чухал ач холбогдолтой газар, усны 30 хувийг ойрын 10 жилд хамгаалан гэсэн НҮБ-ын 193 улс орны амлалт юм. Өнөөдрийн байдлаар дэлхийн хуурай газрын дөнгөж 17 хувь, далайн бүс нутгийн 10 хувийг л хамгаалж байгаа юм байна. Гэрээнд мөн 2030 он гэхэд биологийн олон янз байдлыг дэмжихэд 200 тэрбум доллар зарцуулахаар тусгаж, хоол хүнс, түлшний татаасыг үе шаттайгаар зогсоох замаар дахин 500 тэрбум доллар цуглуулахаар тусгасан байна.

Түүнчлэн уг гэрээгээр 2030 он гэхэд чинээлэг орнууд хөгжиж байгаа орнуудаа байгаль экологио хамгаалахад нь жил тутамд 30 тэрбум ам.долларын тусламж үзүүлэх уриалгыг багтаасан байна. 2019 оны НҮБ-ын тайланд нэг сая орчим ургамал, амьтны төрөл зүйл ойрын хэдэн арван жилийн дотор устах аюул нүүрлэж байгааг анхааруулсан байдаг. Энэхүү болзошгүй аюулын гол нөлөөлөх хүчин зүйл нь амьдрах орчны доройтол, ургамал амьтны зохисгүй хэрэглээ, уур амьсгалын өөрчлөлт, бохирдол, хөгжил гэж мэргэжилтнүүд үзэж байна.