Оросын нефтийн үнэд дээд хязгаар тогтоосон Өрнөдийн шийдвэрийн хариуд ОХУ энэ шаардлагыг дагаж мөрдөх орнууд руу бүтээгдэхүүн гаргахгүй байхаар төлөвлөж байна.

Оросын Ерөнхий сайдын орлогч Александр Новак энэ тухай мэдэгдсэн байна. Мөн хоригийн хариуд Орос улс нефть олборлолтоо бууруулж болзошгүй гэдгийг тэр мэдэгджээ. 

Тухайлбал, 2023 оны эхнээс нефтийн олборлолтын хэмжээг 4-7 хувиар бууруулах боломжтой гэж үзэж байгаагаа А.Новак ярьсан байна. Энэ нь хоногт 500-700 мянган баррель гэсэн үг юм байна.

А.Новак олборлолтыг ийм хэмжээгээр бууруулах нь “ялихгүй ч гэлээ ийм эрсдэл байгаа” гэдгийг дурджээ. Оросын нефтийн үнэд дээд хязгаар тогтоосны хариуд авах арга хэмжээний тухай зарлигийг ирэх 7 хоногийн эхээр баталж, гарын үсэг зурна гэдгээ ОХУ-ын Ерөнхийлөгч Владимир Путин мэдээлсэн байна.

Тэрбээр мөн Оросын нефтийн үнэд босго тогтоосон Өрнөдийн арга хэмжээг дэлхийн эрчим хүчний салбарыг сүйрлийн замд хөтлөх алхам гэж нэрлэжээ. Мөн Өрнөдийн энэ хоригоос болж Орос улсын төсөв болоод компани аж ахуйн нэгжүүдэд ямар ч хохирол учрахгүй гэдгийг Владимир Путин тэмдэглэж, Орос улс тэрхүү дээд хязгаар гэж тогтоосон үнийн орчимд нефтиэ худалдаж байгаа гэдгийг дурдсан байна.

Владимир Путин Оросын төрийн зөвлөлийн хуралдааны дараа болсон хэвлэлийн хурал дээр эдгээр мэдээллийг хийжээ.

Өрнөдийн орнуудын Оросын эсрэг нефтийн хориг 12 дугаар сарын 5-наас мөрдөгдөж эхэлсэн. Энэ хүрээнд Европын холбоо далай тэнгисээр гаргадаг Оросын нефтийг авахаа больсон бол, "Долоогийн бүлэг"-ийн орнууд болон Австрали, Европын холбооны орнууд Оросын нефтийг далайгаар тээвэрлэсэн нөхцөлд баррель тутмын үнийг 60 ам.доллараас хэтрүүлэхгүй байх хязгаар тогтоосон.

Мөн ийм хязгаараас давсан үнээр тээвэрлэлт хийх болон даатгалд хамруулахыг хориглоод байгаа юм. Европын холбоо мөн энэ 7 хоногт Оросын байгалийн хийн дээд үнэд хязгаар тогтоосон. Энэ тухайд авах хариу авах арга хэмжээний тухайд Москва “нягталж боловсруулахад цаг орохоор байгааг” Оросын Ерөнхийлөгчийн хэвлэлийн төлөөлөгч Дмитрий Песков дахин мэдээлсэн байна.

Ерөнхий сайдын орлогч А.Новакийн тухайд хийн үнийг хязгаарлах Европын шийдвэрийг эдийн засгийн бус, улстөрийн шийдвэр гэж нэрлээд, энэ нь тухайн бүс нутгийг өөрийг нь хийн хомсдолд орох талтайг мэдэгджээ.