Украины эрх баригчид хямралыг энх тайвнаар шийдвэрлэх асуудлаар нарийвчилсан санал боловсруулж байгаа тухай "Уолл стрит жорнал"-д мэдээлсэн байна. Зеленскийн багийнхан ирэх оны хоёрдугаар сард энэ саналаа танилцуулж магадгүй талаар тус хэвлэл Америк, Европын эх сурвалжуудаас иш татан уламжилсан байна.

Өмнө нь Зеленский Вашингтонд Ерөнхийлөгч Жо Байдентай уулзсаныхаа дараа Украины хямралыг эв зүйгээр шийдвэрлэх тухай дахь Киевийн саналуудыг Америкийн төрийн тэргүүнтэй хэлэлцлээ. Саналуудыг нь Жо Байден дэмжсэн гэж мэдэгдэж байжээ.

Тэрчлэн Оросын талаас яриа хэлэлцээнд нухацтай бэлэн байдал харуулбал АНУ-ын Ерөнхийлөгч Оросын удирдагчтай уулзахад бэлэн гэсэн байна.

Цагаан ордны Үндэсний аюулгүй байдлын зөвлөлийн төлөөлөгч Жон Кирби хэвлэлийнхэнд мэдээлэл хийх үедээ энэ тухай дурджээ. Владимир Путин бэлэн гэвэл түүнтэй уулзахад бэлэн гэдгээ Ерөнхийлөгч Францын Ерөнхийлөгчтэй уулзахдаа хэлж байсныг Кирби энэ үеэр сануулж, Украинтай асуудлыг зөвлөлдөх нөхцөлийг ч бас үүнд хамруулж авч үзэж байгааг дурджээ.

Үүний зэрэгцээ Оросын Ерөнхийлөгч бүх зэвсэгт хямрал мөргөлдөөн дипломатын яриа хэлэлцээгээр дуусгавар болдог талаар дурдаж, Орос улс Украин дахь хямралыг зогсоох хүсэлтэй байгаа тухай мэдэгдсэн байна.

Тодруулбал, тэр зайлшгүй яриа хэлэлцээ хийх ёстойг Украины эрх баригчид аль болох түргэн ухамсарлавал дээр, бид бол хэзээ ч татгалзаж байгаагүй гэсэн байр суурийг пүрэв гарагт сэтгүүлчидтэй уулзах үедээ илэрхийлжээ.

Түүнээс гадна Хятад улс мөн Украины хямралыг яриа хэлэлцээний замаар шийдвэрлэхийн ямагт дэмжиж байсан гэдгээ мэдэгдлээ. Хятадын Гадаад яамны сайд Ван И АНУ-ын ТНБД Энтони Блинкентэй утсаар ярих үедээ энэ тухай мэдэгдсэн байна.

“Хятад улс хэзээд энх тайвны төлөө, НҮБ-ын дүрэмд заагдсан зорилтуудыг биелүүлэхийн төлөө дуу хоолойгоо өргөж ирсэн. Украины хямралыг шийдвэрлэх үйлсэд бид цаашид ч үр бүтээлтэй үүрэг гүйцэтгэнэ” гэж Хятадын Гадаад яамны сайд мэдэгджээ.

Хятад улсын дарга Ши Жиньпин, АНУ-ын Ерөнхийлөгч Жо Байден нар өнгөрөгч 11 дүгээр сард Индонезэд болсон "Хорийн бүлгийн дээд хэмжээний уулзалт"-ын үеэр Блинкенийг ирэх 2023 оны эхээр Хятадад айлчлуулахаар тохирсон юм.

Оны дараа болох энэ айлчлалын үеэр Украины хямралын сэдэвт чамгүй анхаарал хандуулж хөндөхөөр байгаа юм байна.