Дэлхийн хамгийн том эдийн засгууд болох Америк, Европын холбоо болон Хятадын эдийн засгийн өсөлт  суларсантай холбоотойгоор 2023 онд дэлхийн эдийн засгийн гуравны нэг нь уналтад орох төлөвтэй байгааг ОУВС анхааруулжээ. Нэг үгээр бол 2023он дэлхийн эдийн засгийн хувьд чанга жил байна гэж ОУВС төсөөлж байна.

Тус сан Украины дайн, бодлогын хүүгийн огцом өсөлт зэрэг олон шалтгааны улмаас өнгөрсөн 10 дугаар сард дэлхийн эдийн засгийн өсөлтийн таамгийг 7 дугаар сарын 2,9 хувиас 2,7 хувь болгон бууруулж зарласан. ОУВС-гийн гүйцэтгэх захирал Кристалина Георгиева дэлхийн хоёрдох том эдийн засаг Хятад тэг ковид бодлогоо цуцалсны дараа цар тахлын халдвар нэмэгдэх төлөвтэй байгаагаас тус улсын эдийн засаг сүүлийн 40жилд анх удаа хамгийн муу өсөлттэй байх магадлалтай байгааг онцолжээ.

Өөрөөр хэлбэл Хятад улс цар тахлын хязгаарлалтаа сулруулснаас хойших 3, 4, 5, 6 сарын туршид халдварын тархалт өндөр хувьтай байх магадлал маш өндөр, ялангуяа хятадын цагаан сарын үеэр Хятадын дотоод аялал жуулчлалын оргил үе тохиодог, үүнээс улбаалж халдвар давлагаалах эрдэлтэй, энэ нь ковидоос өмнө дэлхийн эдийн засгийн өсөлтийн 34-40 орчим хувийг бүрдүүлж байсан Хятадын эдийн засгийн өсөлтийг улам сулруулах хүчин зүйл болно гэж ОУВС болгоомжилж байна.

Хятадын эдийн засаг энэ оны эцсээр л сэргэх болов уу гэж таамаглаж байна. Үүний зэрэгцээ Украины дайны шууд болон шууд бус нөлөөлөлд хамгийн их хохирол амсаж байгаа Европын холбооны эдийн засаг энэ онд уналтад орох төлөвтэй байгаа юм байна. Харин Америкийн эдийн засаг уян хатан байдлаа хадгалсан учир энэ онд уналтаас зайлсхийж магадгүй гэж таамаглажээ.