АНУ-ын Төрийн нарийн бичгийн дарга Энтони Блинкен БНХАУ-ын шинээр томилогдсон гадаад хэргийн сайд Чинь Гантай утсаар ярьсан байна. Бээжин, Вашингтон хоёр харилцаагаа сайжруулах арга зам эрэлхийлж байгаа цаг үед Хятад улс АНУ-д сууж байсан элчин сайдаа гадаад хэргийн сайдаар томиллоо.

Хоёр орны харилцааг сайжруулах дипломат ажиллагааны хүрээнд АНУ-ын Төрийн нарийн бичгийн дарга Блинкен энэ оны эхээр Бээжинд айлчлахаар төлөвлөж байна. Блинкэн Хятадын шинэ сайдтай Америк, Хятадын харилцаа болон харилцаа холбооны шугамыг нээлттэй хадгалах талаар хэлэлцсэн тухайгаа твиттер хуудсандаа мэдээлжээ. Хоёр орны харилцаа Тайваний асуудал зэрэг олон шалтгааны улмаас муудсан.

Өнгөрсөн сард Өмнөд Хятадын тэнгист Америкийн агаарын цэргийн тагнуулын онгоц Хятадын цэргийн сөнөөгч онгоцтой 6хан метрийн зайтай зөрсөн нь хоёр орныг түгшээсэн. Гэхдээ өнгөрсөн 11 дүгээр сард Бали аралд болсон Хорийн бүлгийн дээд хэмжээний уулзалтын үеэр АНУ-ын ерөнхийлөгч Жозеф Байден Хятадын дарга Ши Жиньпинтэй уулзсан нь харилцаагаа сайжруулах шинж тэмдэг гэж олон улсын шинжээчид үзэж байгаа.

Өдгөө 56 настай Чинь Ган 2018 оноос 2021оны хооронд гадаад хэргийн дэд сайдаар, 2021-2022оны хооронд Америкт элчин сайдаар суусан туршлагатай дипломат юм байна. Чинь Ган нь Хятад Америкийн харилцааны хамгийн хүнд үед буюу 2021 оны 7 дугаар сард АНУ-д суух элчин сайдаар томилогдож байжээ.

Харин өнгөрсөн 10-аад жилд Хятадын гадаад хэргийн сайдаар ажилласан Ван И ХКН-ын Төв хорооны Гадаад хэрэг эрхлэх газрын даргаар томилогджээ. Ингэснээр Ван И Хятадын гадаад бодлогыг хэрэгжүүлэхэд илүү том үүрэг гүйцэтгэх болсныг харуулж байна.