БНХАУ-д "Тэг ковид" бодлогын хүрээнд хэрэгжиж байсан дүрэм журмыг сулруулсны дараа цар тахлын халдварын тархалт нэмэгдсэнтэй холбогдуулан дэлхийн зарим улсууд Хятадаас ирж байгаа иргэдэд хязгаарлалт тогтоож байгаа.

Тухайлбал Америк, Британи, Франц, Австрали, Канад, Итали, Испани, Өмнөд Солонгос, Япон зэрэг улсууд Хятадаас ирж байгаа иргэдийг заавал сөрөг хариутай байх, зарим нь амны хаалт зүүх зэрэг шаардлага тавьж байна. Харин Энэтхэг улс Хятадаас гадна Япон, өмнөд Солонгос, Тайландаас ирж байгаа зорчигчдоос заавал сөрөг хариутай байхыг шаардах аж.

Тодруулбал, Хятад улс "Тэг ковид" хатуу бодлогоо сулруулснаас хойш халдварын тархалт эрс нэмэгдэж, коронавирусний яг аль хувилбар нь тархаж байгаа талаарх мэдээлэл хомс байгаагаас улс орнууд тус улсаас ирэх иргэдээс халдвар тархаж давлагаалах вий гэж болгоомжилж байна. Мөн Хятадын засгийн газар энэ сарын 8-наас эхлээд хилийн хязгаарлалтаа цуцлахаар болсноо зарласан нь ч улс орнуудын болгоомжлолыг улам нэмэгдүүлжээ.

Хамгийн сүүлд Марокко улс мягмар гарагаас эхлээд Хятадын иргэдийг хилээр нэвтрэхэд нь заавал шинжилгээний сөрөг хариутай байхыг шаардахаар болсон байна. Харин энэ шийдвэр хоёр улсын ард түмний эв найрамдал, стратегийн түншлэлийн харилцаанд ямар ч байдлаар нөлөөлөхгүй гэж Мароккогийн гадаад хэргийн яамнаас мэдэгджээ. Марокко, Хятад улсууд эдийн засгийн харилцаа нь хамгийн их өргөжиж байгаа орнууд. Орон нутгийн хэвлэлийн мэдээлснээр Мароккод 2015 онд 10 мянга байсан Хятад жуулчны тоо цар тахлын өмнөхөн 2018 онд гэхэд жилд 130 мянга болж өссөн байна.

АНУ-ын хувьд 1 дүгээр сарын 5-наас эхлэн Хятад, ХонгКонг, Макаогоос ирж байгаа 2-оос дээш насны бүх иргэдийг хоёр хоногийн дотор өгсөн шинжилгээний сөрөг хариутай байхыг заавал шаардахаар болжээ. Мөн Америкийн өвчний хяналт, урьдчилан сэргийлэх төв иргэдээ Хятад, ХонгКонг, Макао руу зорчих бол шийдвэрээ эргэн харахыг зөвлөж байна. Британи мөн 1 дүгээр сарын 5-наас Хятадаас ирж байгаа бүх хүнээс нислэгийн өмнө өгсөн шинжилгээний сөрөг хариутай байхыг шаардах юм.