Бразилын ерөнхийлөгчөөр дахин сонгогдсон Луиз Инасио Лула Да Силва тангаргаа өргөж, гурав дахь бүрэн эрхээ эхлүүллээ.

Тэрбээр, улс төрийн үзэл санааны улмаас хуваагдсан ард иргэдээ нэгтгэн, бүх ард түмний Бразил улсыг бий болгоно гэсэн амлалт өгчээ. Лулагийн шинэ засгийн газар ядууралтай тэмцэж, амьжиргааны түвшнийг сайжруулан, Амазоны ширэнгэн ойг хамгаална гэж нэн тэргүүний зорилтоо тодорхойлж байна. Шинжээчид Бразилын шинэ засгийн газрын өмнө ард түмнээ нэгтгэх том сорилт тулгарна гэж үзэж байгаа юм.

Тодруулбал, 2003-2010 оны хооронд Бразилын зүүний засгийн тэргүүлсэн Лула Да Силва барууны үзэлтэй Жаир Болсонаруг өнгөрсөн 10 дугаар сард болсон сонгуулиар ялж, гурав дахь бүрэн эрхээ хэрэгжүүлэхээр болсон. Харин Бразилын өмнөх ерөнхийлөгч Жайр Болсонару тангараг өргөх ёслолоос зайлсхийж өнгөрсөн баасан гарагт Америкийг зорьсон юм байна.

Учир нь тангараг өргөх ёслолын үеэр албан тушаалаасаа бууж байгаа ерөнхийлөгч шинээр сонгогдсон ерөнхийлөгчид туузыг нь зүүлгэж өгдөг уламжлалтай. Болсонару гадаад руу явснаар энэ уламжлал эвдэгдэж, ард иргэд нь ерөнхийлөгчдөө туузыг нь зүүлгэжээ. Түүнчлэн Болсонаруг дэмжигчид халдлага үйлдэж болзошгүй шалтгаанаар Бразилын эрх баригчид ерөнхийлөгчийн тангараг өргөх ёслолын үеэр цагдаагийн хүчээ 100 хувь дайчилж, аюулгүй байдлыг сайтар хангажээ.

Лула Да Силва авлигын хэргээр хоригдсон ч түүний ялыг 2021онд хүчингүй болгосноор улс төрд эргэн ирсэн нь Болсонаругийн засаглал дор улс орны эдийн засаг хямарч, цар тахлын үед сул бодлого барьсан зэргээс шалтгаалан Бразилчуудын итгэл алдарсантай холбоотой гэж шинжээчид үздэг.

Лула Да Силва өмнөх хоёр удаагийн бүрэн эрхийнхээ хугацаанд Бразилын ард түмний дунд хамгийн нэр хүндтэй ерөнхийлөгч байсан гэж түүхэнд бичигдсэн. 217 сая хүн амтай, Өмнөд Америкийн хамгийн том улс Бразилын төрийн тэргүүний тангараг өргөх ёслолд Аргентин, Колумб, Уругвай, Эквадор, Ангол, Боливи, Чили, Парагвай, Гондурасын ерөнхийлөгч, Германы ерөнхийлөгч, Испанийн хаан, Хятадын дэд дарга гээд дэлхийн олон орны төр засгийн өндөр дээд төлөөлөгчид уригдан оролцжээ. Лула гадаад бодлогын талбарт Хятад, Америктай харилцах харилцааг эрхэмлэн, Орос, Украины хооронд зуучлалын үүрэг гүйцэтгэхэд бэлэн байгаагаа илэрхийлжээ.