Японд энэ улиралд шувууны томуугийн урьд байгаагүй олон тохиолдол бүртгэгдээд байна. Токиогоос холгүй Чиба мужийн Асахи хот дахь шувуун фабрикт 53 дахь тохиолдол нь батлагджээ.

Орон нутгийн эрх баригчдын мэдээлж байгаагаар, тухайн фермд үхсэн 30 дэгдээхэйг шинжлэхэд шувууны томуугийн халдвар ихтэй вирус илэрсэн байна. Улмаар 10 мянгаад дэгдээхэйг устгалд оруулж, өндөг болон дэгдээхэй тээвэрлэлтэд хязгаар тогтоожээ. Японы ХАА-н яамны мэдээгээр, энэ улиралд тус улс дахь шувууны томуугийн тохиолдлын тоо, 2020-2021 оны өвлийн турш дахь нийт тохиолдлоос давсан байна. Үүний зэрэгцээ даваа гарагт Токиод "ковид-19"-ийн халдварын 7500 гаруй шинэ тохиолдол батлагдсан мэдээтэй байна. Тус улсын эрүүл мэндийн яамны мэдээгээр, энэ нь тэхдээ 7 хоногийн өмнөхөөс 891-ээр буурсан дүн юм байна.

Мөн өдөрт илрэх халдварын тоо 6 дахь өдрөө дараалан буурчээ. Харин нийт Японы хэмжээнд, коронавирусний халдварын шинэ тохиолдол 76 264-т хүрсэн нь өмнөх өдрийнхөөсөө 1649-өөр буурсан үзүүлэлт юм байна. Үүний зэрэгцээ японы засгийн газар халдварт өвчний тухай хуулийн дагуу, "ковид-19"-ийн ангиллыг бууруулах боломжийг авч үзэж эхэлсэн мэдээлэлтэй байна.

Гэхдээ энэ талын өөрчлөлт ирэх хавраас нааш хийгдэх төлөвгүй байгаа юм байна. Одоогийн байдлаар, халдварт өвчнийг хүндрэл болоод халдварлах чадвараас нь хамааруулж тогтоодог 5 шатлалт зэрэглэлээр "ковид-19" хоёр дахь зэргийнхэд багтаж байгаа. Харин хавраас энэ шатлалыг, улирлын томуутай нэг зэрэглэлд буюу 5 дахь шатныхад хамааруулах өөрчлөлт орж мэдэхээр байгаа юм байна. Японд одоо үргэлжилж байгаа "ковид-19"-ийн 8 дахь удаагийн давлагааны явц дахь халдварын чиг хандлагаас хамааруулж ЗГ нь энэ арга хэмжээ авахаар судалж байгаа талаар Жапан таймс-т мэдээлсэн байна.