Ирэх 2-р сарын 3-нд Киев хотноо Украин болон Европын холбоо дээд хэмжээний уулзалт хийхээр төлөвлөж байна. Уг нь хуваарь ёсоор бол, энэ дээд хэмжээний уулзалтыг өнгөрөгч 12-р сард хийх учиртай байжээ. Одоо болох уулзалтаар ЕХ-ны санхүүгийн болон цэргийн дэмжлэгийн талаар хэлэлцэнэ гэж Украины ерөнхийлөгч Володимир Зеленскийн албанаас мэдээлсэн байна.

Тус албаны мэдээллээс үзвэл, Зеленский даваа гарагт Европын комиссын ерөнхийлөгч Урсула Фон Дер Ляйентай утсаар ярих үедээ энэ уулзалтын талаар ярилцжээ. Талууд 2 сарын 3-нд Киевт болох Украин-ЕХ-ны ээлжит дээд хэмжээний уулзалтаас хүлээгдэж байгаа үр дүнгүүд, тус уулзалтын бэлтгэл ажлын талаар мөн ярилцсаныг Украины ерөнхийлөгчийн албаны мэдээлэлд мөн дурдсан байна. Хоёр удирдагч тэрчлэн, “холбогдох зэвсэг нийлүүлэх замаар” Украины зэвсэгт хүчнийг цаашид бэхжүүлэх арга замууд, мөн Украинд 19 тэрбум долларын санхүүгийн тусламж үзүүлэх асуудлыг хэлэлцсэн байна. Энэ үеэр Зеленский тусламжийн эхний ээлжийг энэ сард олгуулахаар шахалт үзүүлснийг мэдээлэлд мөн дурджээ.

Зеленский, Урсула Фон Дер Ляйен нар Украины нурж сүйдсэн 74 сургуулийг сэргээх төслийн хэрэгжилтийн явцыг бас авч үзсэн байна. Энэ төслийн санхүүжилтэд Европын холбоо 100 сая евро гаргасан юм байна. Үүнээс гадна Украинд ЕХ-нд элсэхээр нэр дэвшигч улсын статус олгосонтой холбогдуулж Европын комиссоос өгсөн 7 зөвлөмжийг Киев хангаж биелүүлэх явцын талаар бас хэлэлцжээ. Украины ЕХ-нд гишүүнчлэх хэлэлцээрийн дагуу, жил болгон хоёр тал хооронд дээд хэмжээний уулзалт хийдэг. Ийм уулзалтын сүүлийнх нь 2021 оны 10 сард болж байжээ.