Хятадад цар тахлын дэгдэлт газар авсныг хумихад нь Бээжинд туслах зорилгоор ЕХ коронавирусний эсрэг вакцин үнэ төлбөргүй нийлүүлэх санал тавьжээ. Өнөөдөр эхлэх ЕХ-ны улсуудын ЭМЯ-дын уулзалтын босгон дээр энэ саналыг тавьсан байна. Бээжин “тэг ковид” бодлогоос татгалзсаны дараагаас халдварын шинэ давлагаа үүсч болзошгүй байгаа тул Европын хариу арга хэмжээг зохион байгуулах хүрээнд ЕХ-ны эрүүл мэндийн комиссар Стелла Кириакидисийн авч буй хүчин чармайлтын нэг хэсэг нь дээрх санаачилга юм байна. 

Энэ хүрээнд Хятадын эрүүл мэндийн салбарынханд эв санааны нэгдлээ илэрхийлж, дэмжлэг үзүүлэх хүрээнд, нийгмийн эрүүл мэндийн салбарт шинжээчийн тусламж үзүүлэх, вакцин хандивлах зэрэг саналууд тавьсныг “Файнэншл таймс”-т мэдээлжээ. Харин Бээжин ЕХ-нд одоогоор ямар нэг хариу өгөөгүй байгаа юм байна. Европын холбооны орнуудад, коронавирус болон түүний дэд хувилбаруудын эсрэг вакцинууд үйлдвэрлэгчидтэй урт хугацаатай их хэмжээний захиалгын гэрээтэй учраас вакцины илүүдэл нөөц чамгүй их байгаа юм байна. Харин Хятадын тухайд дан өөрийн үйлдвэрийн Синовак, Синофарм вакцинуудыг ашиглаж, харин генетикийн материалд суурилсан өрнөдийн үйлдвэрийн вакцинуудыг өргөн хэмжээгээр хэрэглээнд хараахан нэвтрүүлээгүй байгаа. ДЭМБ Хятадад коронавирусний эсрэг вакцины хамрагдалт хангалтгүй байгааг өнгөрсөн сарын 21-нд мэдэгдэж байсан. Хүн амын эрсдэлт бүлгийнхнийг ковидоор хүндээр өвдөхөөс сэргийлэхийн тулд хятад вакцины 3 хүртэл тунг тариулах шаардлагатай болдог. Хоёр тун вакцинтай үед 60-аас дээш насныханд ердөө 50 хувийн дархлаа л тогтдог гэж ДЭМБ-ын эрүүл мэндийн салбарын онцгой байдал эрхэлсэн гүйцэтгэх захирал Майкл Райан хэвлэлийн бага хурал дээр ярьжээ. Үүний зэрэгцээ Хятадын 80-аас дээш насныхны ердөө 40 хувь нь 3 тун вакцинд хамрагдсан гэсэн ДЭМБ-ын мэдээ байгаа юм. Энэ зуур олон орон, түүний дотор ЕХ-ны улсууд Хятадаас аялагч жуулчид хүлээж авахад тавих хяналтаа чангатгаж байна. Германы нийгмийн эрүүл мэндийн албаны эмч нарын холбооны тэргүүн Йоханнес Нисен Хятадаас ЕХ руу нэвтэрч байгаа бүх хүнийг европын нэгдсэн шинжилгээнд хамруулах уриалга дэвшүүлжээ. Мөн Европ даяар хамгаалалтын нэгдсэн бодлого шаардлагатай байгааг тэр дурдсан байна. Харин ЕХ-нд суугаа Хятадын төлөөлөгчийн газраас улсад нь вакцины хамрагдалт сайн байгаа талаар ням гарагт мэдэгдэж байсан байна. Мөн хятадын жуулчид ямар ч аюул дагуулахгүй гэдгийг тус төлөөлөгчийн газрын мэдэгдэлд тэмдэглэж, Хятадаас ирэх хүмүүсийг ковидын шинжилгээнд хамруулах болон бусад арга хэмжээ авахыг Европын өвчлөлд хяналт тавих урьдчилан сэргийлэх төв “зөв зүйтэй бус” гэж үзсэнийг бас дурджээ.