Европын Холбоо ковидын шинжилгээний сөрөг хариутай зорчигчдыг Хятадаас хүлээж авах нислэгт суулгах шаардлага тавихыг гишүүн орнууддаа “чандлан зөвлөмж” болголоо. Европын Холбооны эрүүл мэндийн салбарын мэргэжилтнүүдийн 7 хоног шахмын зөвлөгөөний эцэст, нийт 27 гишүүн улсын хэмжээнд Хятадаас ирэх зорчигчдод хязгаарлалт тогтоох нэгдсэн шийдэлд хүрээгүй. Гагцхүү дээрх уриалгыг дэвшүүлэхээр тогтжээ.

Итали, Франц, Испани зэрэг улсууд Хятадаас аялагч жуулчид хүлээж авахдаа хязгаарлалт тогтоогоод байгаа. Хятад улс харин ийм арга хэмжээг нь эрс буруутгаж, хэрвээ Европын Холбооны хэмжээнд хориг хязгаарлалт нэвтрүүлбэл хариу арга хэмжээ авна гэж анхааруулж байсан юм.

Улмаар Европын холбооны орнууд руу нисэх зорчигчид онгоцонд суухаас өмнө заавал шинжилгээний сөрөг хариутай байх шаардлагыг чандлан мөрдөхийг Европын Холбоо гишүүн орнууддаа ийнхүү зөвлөмж болгож байна. Ийм шаардлага тавихыг Холбооны дийлэнх улс зөвшөөрч байгаа гэдгийг Евро Комиссын төлөөлөгч Тим Макфи өчигдөр мэдээлж байсан юм. Харин Хятадаас ирэх болон буцах бүх нислэгийн туршид зорчигчид амны хаалт зүүх болон бусад хувийн эрүүл ахуйн журмыг сахиулах тал дээр Европын Холбооны бүх гишүүд бүрэн санал нэгджээ.

Үүний зэрэгцээ Хятадын засгийн газар болон Европын эрүүл мэндийн салбарын мэргэжилтнүүд Хятадад илэрч байгаа коронавирусний дэд хувилбарууд Европт ч бас өргөн дэлгэр тархалттай байгаа учраас тэгтлээ хатуу хязгаарлалт тогтоох шаардлагагүй гэдэг байр суурь илэрхийлж байжээ. Дэлхий даяар 300 гаруй нисэх компанийг нэгтгэдэг Олон улсын агаарын тээврийн холбоо мөн дээрх байр суурин дээр хатуу зогсч байгаагаа илэрхийлсэн. “Сүүлийн 3 жил үр өгөөжгүй гэдэг нь нэгэнт батлагдсан ийм хориг хязгаарлалтыг сэргээх гэж байгаа нь туйлаас сэтгэл гонсойлгож байна” гэж Олон улсын агаарын тээврийн холбооны ерөнхий захирал Уилли Уолш мэдэгдсэн байна.

Харин ДЭМБ-ийн тэргүүн Тедрос Аданом Гебрейесус Хятадын засгийн газраас вирусийн дэгдэлтийн талаарх хангалттай мэдээ баримт нийлүүлэхгүй байгаа нь улс орнуудыг олноороо хятадын аялагч жуулчдад хязгаарлалт тогтооход хүргэж байгаа шалтгаан байх гэж ярьжээ.