Бразилын өмнөх ерөнхийлөгч Жаир Болсонаругийн дэмжигчид төр засгийн орднуудад халдсаныг буруутгасан хамтарсан мэдэгдлийг тус улсын төрийн эрх барих гурван гол байгууллагаас гаргажээ. Дээд шүүхийн тэргүүн нар болон Конгрессын хоёр танхимын дарга нарын энэ мэдэгдэлд Ерөнхийлөгч Луис Инасиу Лула да Сильва нэгдэж, ням гарагт нийслэл Бразилиад болсон улс төрийн хүчирхийллийн ажиллагааг эрс буруутгасан байна.

Тодруулбал, өнгөрөгч 10 сард болсон сонгуульд ялагдлаа хүлээхээс татгалзаж байгаа хэт барууны үзэлт ерөнхийлөгч асан Болсонаруг дэмжигч хэдэн мянган хүн ням гарагт Конгресс, Дээд шүүх болон ерөнхийлөгчийн ордонд дайран орж үймээн дэгдээсэн юм. Тэдний зарим нь энэ үеэр, Болсонаруг засгийн эрхэнд буцаан гаргаж, одоогийн ерөнхийлөгч Лула-г зайлуулахыг уриалж байжээ.

Бразилын түүхэн дэх хамгийн зөрчилтэй энэ сонгуулийн дүнгээр Лула да Сильва энэ оны нэгдүгээр сарын 1-нд тангаргаа өргөж албандаа орсноос хэдхэн хоногийн дараа ийм эмх замбараагүй явдал дэгдсэн байна. Зүүний үзэлт удирдагч Лула 10 сарын 30-нд болсон хоёр дахь шатны сонгуульд Болсонаругаас яльгүй давуу, 50,8 хувийн саналаар ялалт байгуулсан юм. Үүний зэрэгцээ сонгуулийн дүнг эсэргүүцэж дэмжигчид нь төр засгийн байрууд руу дайран орж үлэмж хэмжээний хохирол учруулсан хэрэг явдалд холбогдуулж ерөнхийлөгч асан Жаир Болсонаруг албадан гаргаж өгөхийг АНУ-аас шаардах “магадлал бага, бас төвөгтэй” гэдгийг Бразилын хууль зүйн сайд Флавио Дино мэдэгджээ.

Түүний мэдээлснээр, энэ эмх замбараагүй явдалд оролцсон 1500-аад хүнийг саатуулаад байгаа юм байна. Өөрийн бүрэн эрхийн хугацаа дуусахаас хэдхэн хоногийн өмнө буюу шинэ жилийн босгон дээр Бразилаас явж, АНУ-ын Флоридад очоод байгаа Болсонару үймээн самуунд өөрийг нь холбоотой гэдэг зэмийг үгүйсгэж, хэрэг явдал тайван, ардчилсан замаар эсэргүүцлээ илэрхийлэх хэр хэмжээнээс хэтэрсэн гэж мэдэгджээ.