
БНХАУ Өмнөд Солонгосын иргэдэд богино хугацааны виз олгохоо түр хугацаанд зогсоосон байна. Сөүл дэх Хятадын элчин сайдын яамнаас Өмнөд Солонгосын иргэдэд бизнес, аялал жуулчлал, эмчилгээ, дамжин өнгөрөх болон хувийн ажлаар зорчих визийг түр хугацаанд олгохгүй болсноо мэдэгджээ.
Энэ бол "Иргэдийг нь хилээр нэвтрүүлэхдээ ялгаварлан гадуурхсан хязгаарлалт тогтоосонтой холбоотой" гэж Бээжин шийдвэрээ тайлбарлажээ. Харин "Өмнөд Солонгос шинжлэх ухаанд үндэслэн гаргасан" гэж шийдвэрээ хамгаалж байна.
Энэ нь Хятадаас ирж байгаа иргэдэд хязгаарлалт тогтоосон улс орнуудын эсрэг Бээжингийн зүгээс хариу арга хэмжээ авсан анхны тохиолдол боллоо.
Тодруулбал, Өмнөд Солонгосын тал Хятадын иргэдэд богино хугацааны виз олгохоо түр хугацаагаар буюу энэ сарын 31 хүртэл зогсоожээ. Өмнөд Солонгос нэгдүгээр сарын 5-наас эхлэн Хятадаас ирж байгаа иргэдээс нислэгийнхээ өмнө өгсөн Писиар шинжилгээний сөрөг хариутай байхыг шаардах зэргээр хязгаарлалт тогтоож байгаагаа өнгөрсөн сард зарласан юм.
Үүнийгээ Хятадаас ирж байгаа иргэдээс халдвар тархах, шинэ хувилбар орж ирэх эрсдэлд бэлтгэлтэй байх үүднээс авч хэрэгжүүлж байгаа арга хэмжээ гэж тайлбарласан юм.
Мөн Өмнөд Солонгос болон Хятадын хоорондох нислэг зөвхөн Сөүлийн Инчон олон улсын нисэх буудлаар хязгаарлагдаж, Бусан, Дэгү, Жежү чиглэлийн нислэгийг түр зогсоосон аж.
Хятадын шинээр томилогдсон гадаад хэргийн сайд Чинь Ган Өмнөд Солонгосын гадаад хэргийн сайд Пак Жин-тэй хилийн хязгаарлалтын асуудлаар утсаар ярихдаа иргэдэд нь ийнхүү хязгаарлалт тавьсныг эсэргүүцэж байгаагаа илэрхийлжээ.
Одоогоор Хятадад ковид 19цар тахлын халдварын тархалт давлагаалж, шинэ хувилбар илэрсэн байж болзошгүй зэргээс болгоомжлон Өмнөд Солонгосоос гадна Америк, Британи, Япон зэрэг 10 гаруй улс Хятадаас ирж байгаа иргэдэд хязгаарлалт тогтоогоод байна.
БНХАУ БНСУ-ын иргэдэд богино хугацааны виз олгохоо түр зогсоолоо | ||
Үзсэн: 430 | Mongolian National Broadcaster |
Сэтгэгдэл бичих:
АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.