Хятадын засгийн газар төрийн өмчит компаниуддаа Австралиас нүүрс авахыг зөвшөөрсөн тухай мэдээлэл олон улсын хэвлэлүүдээр гарсан. Харин Канберрад суугаа БНХАУ-ын элчин сайд Австралийн нүүрсний экспортод албан ёсны хориг үйлчлээгүй байгаа, тус улсаас нүүрс худалдаж авах эсэх нь Хятадын компаниудын шийдэх асуудал гэж мэдэгджээ. Энэ бол Бээжин Австралийн нүүрсний экспортод тавьсан хоригоо цуцалж, Австралийн талаас харилцаа, хамтын ажиллагаагаа сэргээе гэсэн удаа дараагийн уриалгын хариуд өгсөн эерэг дохио гэж олон улс харж байна.

2020 оны 4-р сараас эхлэн Хятадын засгийн газар Австралиас зарим нэр төрлийн бараа бүтээгдэхүүн импортлохоо зогсоосон. Үүнд нүүрснээс гадна зарим нэр төрлийн үр тариа, далайн хүнс, дарс зэрэг бүтээгдэхүүн багтсан. Бээжин үүнийгээ коронавирусний уг гарлыг олон улсын түвшинд судалъя гэсэн улс орнуудын уриалгад Австрали улс нэгдсэний хариуд авсан арга хэмжээ гэж тайлбарласан. Харин өнгөрсөн онд Австралийн ерөнхий сайдаар Энтони Албаниз томилогдсоны дараа Хятадтай харилцах харилцааг сайжруулахад ихээхэн анхаарч, эерэг өөрчлөлтүүд ч гарч байгаа юм. Өнгөрсөн оны 11-р сард Индонезийн Бали аралд болсон Хорийн бүлгийн дээд уулзалтын үеэр Австралийн ерөнхий сайд Албаниз Хятадын дарга Ши Жиньпин нар уулзаж, Австралийн гадаад хэргийн сайд Хятадад айлчилсан. Элчин сайд Шиао Чиан Хятад, Австралийн харилцаа эргэлтийн эгзэгтэй үе шатанд байна, аль аль тал нь худалдааны асуудлыг шууд хэлэлцээ хийх замаар шийдвэрлэхийг эргэлзэж байгааг тэмдэглэжээ. Түүний хэлснээр Хятад Австралийн албаны хүмүүс худалдааны маргааныг шийдвэрлэхээр Женевд хэлэлцээ хийж байгаа юм байна.

Мөн Хятад улс төрийн дэмжлэгтэй томоохон компаниуд, болон гангийн нэг үйлдвэрийг Австралиас гангийн импортоо сэргээхийг зөвшөөрч магадгүй байгаа талаар саяхан Блүүмберг мэдээлсэн. Хятад улс нь Австралийн худалдаа үйлчилгээний салбарт хамгийн том түнш нь төдийгүй Австралийн төмрийн хүдэр, шингэрүүлсэн байгалийн хий, нүүрс, алт, ХАА-н бүтээгдэхүүний экспортын хамгийн том зах зээл нь. 2020-2021 оны хооронд Австрали дээрх нэр төрлийн бараа бүтээгдэхүүний экспортоос 160тэрбум долларын орлого олжээ.