БНСУ-ын ерөнхийлөгч Юн Сок Ёлын төрийн айлчлалын хүрээнд Өмнөд Солонгос улс Арабын Нэгдсэн Эмират улстай стратегийн онцгой түншлэл хөгжүүлэхээр тохирлоо. Мөн Арабын нэгдсэн Эмират улс Өмнөд Солонгосын цөмийн эрчим хүч, батлан хамгаалах, эрчим хүчний салбарт 30 тэрбум ам.долларын хөрөнгө оруулахаар 10 гаруй харилцан ойлголцлын санамж бичиг байгуулжээ. Экспортоо нэмэгдүүлэх замаар Өмнөд Солонгосын эдийн засгийн өсөлтийг тэлэх бодлого баримталж байгаа ерөнхийлөгч Юн Сок Ёлын Абу Дабид хийж байгаа энэхүү төрийн айлчлалын гол зорилго стратегийн чухал салбаруудад харилцан хөрөнгө оруулалт хийх, экспортоо нэмэгдүүлэх, шинэ салбарт хамтын ажиллагаа эхлүүлэхэд чиглэж байна. Өмнөд Солонгосын ерөнхийлөгчийн төрийн айлчлалд тус улсын 100 компани тэр дундаа Самсунг электроникс, Эс Кей групп, Хьюндай мотор зэрэг тэргүүлэх байгууллагуудын удирдлага бүхий бизнесийн төлөөлөгчид багтсан байна. Өмнөд Солонгос, Арабын нэгдсэн Эмират улсууд харилцаагаа стратегийн онцгой түншлэлд хүргэн хөгжүүлэхийн зэрэгцээ цөмийн эрчим хүч, хөрөнгө оруулалт, батлан хамгаалах, эрчим хүчний салбарт хамтын ажиллагаагаа өргөжүүлэн, эрүүл мэнд соёл, иргэд хоорондын харилцаа зэрэг шинэ салбарт ч харилцаагаа ахиулахаар дээд хэмжээний уулзалтын хүрээнд тохирчээ. 

Тухайлбал гэрээний дагуу хоёр тал батлан хамгаалах аж үйлдвэрлэлд хамтарсан хөрөнгө оруулалт, судалгаа, технологи хөгжүүлэх чиглэлд хамтран ажиллах юм байна. Эрчим хүчний эрэлт ихтэй Өмнөд Солонгос нь түүний газрын тосны нийлүүлэлтийн 10 хувийг Эмиратаас авдаг. Сөүл Эмиратын Баракахд цөмийн эрчим хүчний станц байгуулахаар том төсөл эхлүүлсэн. Энэ нь хилийн чанадад цөмийн станц байгуулах Сөүлийн анхны чармайлт юм. Дөрвөн реактортой уг станцын хөрөнгө оруулалт нь 20 тэрбум доллар юм байна.

Өмнөд Солонгос Абу Дабигийн зах зээлд автомашин, гар утас зэрэг бараа бүтээгдэхүүн экспортолдог, худалдааны эргэлт олон тэрбум долларт хүрчээ. Энэ айлчлалын хүрээнд Өмнөдийн талаас Эмиратад зэвсэг нийлүүлэх шинэ гэрээ байгуулна гэж Өмнөд Солонгосын ерөнхийлөгчийн тамгын газраас нэрээ нууцалсан эх сурвалж мэдээлсэн байна. Үүнээс өмнө өнгөрсөн онд Эмират Өмнөд Солонгосын пуужин эсэргүүцэн хамгаалах гол зэвсэг болох дунд тусгалын газар агаар ангиллын Чеонгунг-2 системийг худалдан авахаар 3,5 тэрбумын гэрээнд гарын үсэг зурсан юм. Энэ бол хоёр улс 1980онд дипломат харилцаа тогтоосноос хойш Өмнөд Солонгосын төрийн тэргүүний хийж байгаа анхны айлчлал юм байна.