Орос болон Беларусийн батлан хамгаалах яамд /2023.01.16/ Украины хойд хилийн ойролцоо цэргийн хамтарсан сургуулилалт эхлүүлж байна. Москва Украины эсрэг дахин довтлох зорилгоор холбоотон Беларусийн газар нутгийг ашиглаж байх вий гэж Киев болон Өрнөдийнхөн болгоомжилж байна. Хоёр орны агаарын цэргийнхэн хамтран оролцож байгаа энэхүү сургуулилалтыг Беларусийн агаарын цэргийн баазуудад энэ сарын 16-наас 2-р сарын 1-нийг хүртэл хийх юм байна. Беларусийн батлан хамгаалах яам энэхүү цэргийн хамтарсан сургуулилалтыг цэвэр батлан хамгаалах зорилготой, дайнд орох ямар ч төлөвлөгөө байхгүй гэж мэдэгджээ. Ингэхдээ Минск Украиныг Беларусийг өдөөн хатгаж, хоёр орны хилд үймээн бужигнаан үүсгэлээ гэж буруутгасан байна.

Орос өнгөрсөн оны 2-р сарын 24-нд Украин руу цэрэглэн орохдоо Беларусийн газар нутгийг ашигласан юм. Одоо Москва Украины дайнд оролцуулахын тулд Беларусийн ерөнхийлөгч Лукашенкод шахалт үзүүлж байна гэх буруутгасан байр суурийг няцааж байна. Харин Киев Минскийн талаас дахин довтолж болзошгүй байна гэж удаа дараа анхааруулсаар байгаа юм. Беларусь нь Москва Украинд дайн эхлүүлснээс хойш дангаараа болон Москватай хамтран хэд хэдэн удаа цэргийн сургуулилалт хийсэн. Ингэхдээ зэвсэг, цэргийн техник хэрэгслийнхээ хүчин чадлыг улам нэмэгдүүлж ирсэн гэж цэргийн шинжээчид үзэж байгаа юм байна.

Орос Армийн зэвсэг, техник тэр дундаа сөнөөгч онгоц, нисдэг тэрэг болон тээврийн онгоцуудыг энэ он гарснаас хойш Беларусь руу зөөвөрлөсөн, сая ням гарагт гэхэд найман сөнөөгч оноц, ачааны дөрвөн онгоц Минскд буусан Телеграм дахь Цэргийн албан бус хяналтын сүлжээгээр мэдээлснийг Евроньюс иш татжээ. Харин энэ бол зэвсэг тээвэрлэсэн хэрэг биш, зөвхөн Оросын агаарын хүчний анги нэгтгэлүүд л Беларусьт ирсэн юм гэж Минскээс мэдэгдсэн байна. Энэ үеэр Эн Эйч Кей Украины Беларусьтай залгаа хилийн бүсийн зарим иргэд нутгийн гүн рүү дүрвэх бэлтгэлээ хангаж байгаа талаар мэдээлжээ.