Шууд Chart

БНХАУ Египет улстай хөрөнгө оруулалт, аялал жуулчлалын хамтын ажиллагаагаа өргөжүүлнэ

2023-01-17 10:50:21

БНХАУ-ын гадаад хэргийн шинэ сайд Чинь Ган Арабын улс орнуудаар хийсэн урт хугацааны айлчлалаа Египет улсаар өндөрлүүлж байна. Айлчлалын гол зорилго байгалийн баялаг нөөцтэй Африк тивд Бээжингийн оролцоо, нөлөөг бэхжүүлэхэд чиглэсэн байна. Хятадын гадаад хэргийн сайд Египетийн ерөнхийлөгч болон Арабын холбооны ЕНБД нартай тус тусын уулзалт хийж, хөрөнгө оруулалт, аялал жуулчлалын салбарын хамтын ажиллагаагаа өргөжүүлэхээр тохирсон байна. Талууд эдийн засгийнх нь гол тулгуур аялал жуулчлалын салбараа сэргээх бодлого барьж байгаа Египет рүү Хятадын жуулчдыг нэмэгдүүлэх, Египетийн дэд бүтцийн төслүүд тэр дундаа Хятадын бүс ба зам санаачилгатай холбоотой төслүүдэд Бээжин хөрөнгө оруулалтаа нэмэгдүүлэх асуудлыг голлон хэлэлцсэн байна.

Хятад улс Суэцийн сувгийн эдийн засгийн бүс, шинэ нийслэл барих зэрэг Египетийн төрийн дэмжлэгтэй төслүүдэд сүүлийн жилүүдэд олон тэрбум долларын хөрөнгө оруулалт хийж ирсэн юм. Иймээс цаашид хөрөнгө оруулалтыг нэмэгдүүлэх талаар Хятадын гадаад хэргийн сайд Египетийн ерөнхийлөгчтэй хэлэлцлээ. Бээжин Африкийн улс орнуудад автозам, эрчим хүчний дэд бүтэц, харилцаа холбоо, төмөр зам, эмнэлэг гээд дэд бүтцийн бүтээн байгуулалтад нь их хэмжээний хөрөнгө оруулж байгаа. Хятадын санхүүгийн групп, сангууд ч мөн 2000-2020 оны хооронд Африкийн орнуудад 160 тэрбум долларын зээл олгосон байна. Цар тахлын үед Хятад улс дэлхийн вакцины нийлүүлэлтийн нэг хүрэхгүй хувийг л авч байсан Африк тивийг вакцинаар хангах чиглэлд идэвхтэй дипломат ажиллагаа явуулсан юм. Томилогдоод удаагүй шинэ сайд анхны гадаад айлчлалаа Африк тивээс эхлүүлсэн нь уламжлалаа дагасан хэрэг.

Сүүлийн 30-аад жилд Хятадын гадаад хэргийн сайд нар хүн ам нь хурдтай өсөж байгаа Африк тивд айлчилснаар бүрэн эрхээ эхлүүлдэг болсон. Хятадын шинэ сайд Чинь Ган Африкийн холбооны төв байр байрладаг Этиоп улсаас айлчлалаа эхлүүлж, Габон, Ангол, Бенин зэрэг улсуудаар айлчлалаа үргэлжлүүллээ.

Нийтэлсэн: Moнголын мэдээ

БНХАУ Египет улстай хөрөнгө оруулалт, аялал жуулчлалын хамтын ажиллагаагаа өргөжүүлнэ   
Үзсэн: 340 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй