Дэлхийн эдийн засгийн форум “Хуваагдсан дэлхий ертөнц дэх хамтын ажиллагаа” сэдвийн дор Швейцарын Давос хотноо /2023.01.16/ эхэлж байна. Дэлхий нийтийн өмнө тулгарч байгаа олон арван, харилцан уялдаатай сорилтуудыг хэрхэн даван туулж, төр, хувийн хэвшлийн хамтын ажиллагааны замаар шийдлээ хайхад Давосын энэ удаагийн чуулгын гол зорилго чиглэж байна. Дэлхийн 52 улсын төр засгийн тэргүүн, бизнесийн байгууллагуудын 600 гаруй төлөөлөл, урлаг соёлын алдартнууд, иргэний нийгмийнхэн гээд 2700 орчим зочид төлөөлөгч Давосын чуулганд уригдсан байна. Дэлхийн эдийн засгийн чуулга уулзалт Швейцарын Альпийн нурууны Давос хотноо энэ сарын 16-наас 20-ны хооронд болно.

Цар тахал дэгдсэнээс хойш анх удаа нүүр тулж уулзаж байгаа нь энэ жилийн чуулганы гол онцлог нь. Энэ жилийн Давосын чуулганд Германы канцлер Олаф Шольц, Европын комиссын ерөнхийлөгч Урсула фон дер Лейен, Өмнөд Солонгос, Колумб, Филиппиний ерөнхийлөгч зэрэг өндөр дээд 50гаруй төлөөлөгч урилгаар оролцож байна. Украин, Хятадаас өндөр түвшинд оролцож байгаа юм байна. Гэхдээ аюулгүй байдлын үүднээс зочдын нэрсийг урьдчилж зарлахгүй байхыг зохион байгуулагчдаас хүссэн юм байна. Давосын чуулганы төлөөлөгчид энэ хэд хоногт Америк Хятадын харилцааны төвөгтэй байдал, Оросын Украинд хийж байгаа дайн зэргээс дэлхийн эдийн засагт үзүүлэх сөрөг нөлөөллийг хэрхэн даван гарах, эдийн засгийг глобалчлалын замд оруулахын тулд юу хийх талаар хэлэлцэх төлөвтэй байна.

Эрчим хүч, цаг уур, хөрөнгө оруулалт, худалдаа, ирээдүйн технологи, ажлын байр, эрүүл мэнд, нийгмийн хөдөлгөөн зэрэг олон асуудал дээр төр хувийн хэвшлийн хамтын ажиллагааг бий болгох санаа, инновац, судалгааг хэлэлцэх гол асуудалд багтаажээ. Мөн олон улсын хамтын ажиллагааг шаардаж байгаа цаг уурын өөрчлөлт болон бусад тулгамдсан асуудлуудыг ч нухацтай авч үзэх юм байна.Бид дайн зөрчлийг зогсоох шийдэл хайх, эдийн засгаа уналт руу түлхчихгүй байх гарцыг хамтдаа олох ёстой гэж Дэлхийн эдийн засгийн форумын ерөнхийлөгч Бёрге Бренде мэдэгджээ.