НҮБ өнгөрсөн оны 2-р сарын сүүлээр ОХУ Украинд дайн эхлүүлснээс хойш дайны хөлд 7000 гаруй энгийн иргэн амь үрэгдсэн болохыг судалгаанд үндэслэн тайлагнажээ. Гэхдээ НҮБ-ын шинжээчид амь үрэгдсэн хүний тоо үүнээс илүү олон байж магадгүй гэж таамаглаж байна. НҮБ-ын хүний эрхийн дээд комиссарын газраас өнгөрсөн оны 2-р сарын 24-нд дайн эхэлснээс хойш сая ням гараг хүртэл Украинд 7031 энгийн иргэн амь үрэгдсэн тухай албан ёсны тоо баримттай тайланг танилцуулсан байна. 7031 хүний 433 нь хүүхэд байна. Гэхдээ тус газар дайны фронт болон Оросын хяналтад байгаа газруудаас бодит мэдээлэл авч чадахгүй байгаа учир амь үрэгдсэн хүний тоо үүнээс илүү олон байх үндэслэлтэй гэж үзэж байгаа юм байна.

Өнгөрсөн бямба гарагт Оросын армийн харвасан пуужинд Украины зүүн бүс нутгийн дайны фронтоос алслагдмал Днипро хотод есөн давхар орон сууцны барилга өртөж сүйдсэн. Украины онцгой байдлын газраас өгсөн мэдээллээр Днипрод болсон пуужингийн халдлагад 44 хүн амь үрэгдсэний дөрөв нь хүүхэд байсан байна. Мөн 79 хүн гэмтэж шархаджээ. Одоогоор аврах албаныхан барилгын нуранги дороос 20 хүнийг эрэн хайж байгаа юм байна. Энэ үеэр Оросын ерөнхийлөгчийн тамгын газраас Украины армийнхан уг пуужинг андуурч харвасан байж болзошгүй гэж мэдэгдсэн байна.

Харин Британийн батлан хамгаалах яам бөмбөгдөгч онгоцноос хөөргөсөн Оросын хөлөг онгоц эсэргүүцэгч том оврын пуужин орон сууцны барилгыг оносон байх өндөр магадлалтай байгаа талаар мэдээлжээ. Учир нь Оросын уг пуужин газрын байны эсрэг ашиглахад оновчгүй, түүний радарын чиглүүлэх систем нь хот суурин газарт байг ялгах чадвар муу гэж Британийн батлан хамгаалах яамны шинжээчид дүгнэжээ. Харин өчигдөр Оросын батлан хамгаалахын сайд Сергей Шойгу Украины дайны командлалын төв байранд очиж, нөхцөл байдалтай танилцсан тухай тус улсын батлан хамгаалах яамнаас мэдээлжээ.