Германы канцлер Олаф Шольц батлан хамгаалахын сайдад ахмад улс төрч Борис Писториусыг томилж байна. Канцлер Шольц “Писториус Оросын Украинд хийж байгаа дайны талаарх болчимгүй мэдэгдлээсээ болж олон нийтээс хүчтэй шүүмжлэлтэй тулгарч, албан тушаалаасаа огцорсон Кристина Ламбрехтаас албан үүргийг нь хүлээн авна” гэж мэдэгджээ.

Өдгөө 62 настай Писториус нь 2013 оноос хойш хойд нутгийн Доод Саксони мужид дотоод хэргийн сайдаар ажилласан юм байна. Шольцийн эрх баригч Социал Демократ намын гишүүн юм. Тэрээр Германы ерөнхийлөгч Франк-Вальтер Штайнмайераас сайдын албан тушаалд томилогдох батламжаа хүлээн авч, пүрэв гарагт Парламентад тангараг өргөснөөр бүрэн эрхээ хэрэгжүүлэх юм байна. Шинээр томилогдсон батлан хамгаалахын сайд Борис Писториус Германы арми Орос Украинд дайн хийж байгаа энэ үед шинэ жишигт дасан зохицох ёстой гэдгийг цохон тэмдэглэжээ. Хэвлэлийн бага хурал дээр канцлер Шольц Писториус аюулгүй байдлын бодлого барихад асар их туршлагатай, энэ хариуцлагатай ажилд шаардлагатай хүч чадал, буурь суурь түүнд бий гэдгийг онцолжээ.

АНУ болон Европын орнууд энэ баасан гарагт Украинд зэвсэг нийлүүлэх асуудлаар Германтай хэлэлцээ хийхээр төлөвлөж байна. Иймээс Герман улс батлан хамгаалахын сайдаа яаравчлан томилох шиг боллоо гэж зарим хэвлэлд онцолжээ. Британи улс Украинд байлдааны танк нийлүүлэхээр аль хэдийн шийдвэрээ гаргаад байна. Шинжээчдийн хувьд Герман улсыг Украинд танк нийлүүлэх шийдэлд хүрэх эсэх дээр анхааралтай ажиглаж байгаа юм байна.