Австралийн армийн 70 гаруй сургагч Украины цэргүүдийг Оросын эсрэг тулалдахад нь сургаж дадлагажуулах зорилгоор энэ 7 хоногт Британийг зорих гэж байгааг тус улсын засгийн газраас мэдээлжээ. Энэхүү сургалт Украины зэвсэгт хүчинд нэмэлт хүч өгөх, хот газар, ой модтой орчинд явган цэргийн үндсэн тактикт анхаарлаа төвлөрүүлэх дадал суулгах, Украины цэрэгт эх орноо хамгаалахад шаардлагатай цэргийн ур чадварыг эзэмшүүлэхэд үр дүнгээ өгнө гэж Австралийн батлан хамгаалахын сайд мэдэгдсэн байна. Австралийн засгийн газар армийн алба хаагчдаа илгээж сургалт хийх нь Украины цэргүүдэд тулалдааны талбарт шаардлагатай ур чадварыг эзэмшүүлэхэд маш чухал ач холбогдолтой гэж үзэж байна.

Харин энэ сургалтын хөтөлбөрийн хүрээнд Австралийн цэргийн бие бүрэлдэхүүн Украины газар нутагт орохгүй, Британийн цэргийн баазуудад сургалтыг зохион байгуулах юм байна. Австрали улс Орос Украинд дайн эхлүүлснээс хойших нэг жилийн хугацаанд Киевт 458 сая америк долларын тусламж үзүүлсэн байна. Үүнээс 332 сая америк доллар нь зөвхөн цэргийн тусламж юм байна.