Өчигдөр Украины дотоод хэргийн сайд зорчиж явсан нисдэг тэрэг нийслэл Киевийн ойролцоо Бровары дагуул хотын хүүхдийн цэцэрлэгийн барилга дээр унаж осолдсон байна. Ослын улмаас дотоод хэргийн сайд, дэд сайд мөн тус яамны төрийн нарийн бичгийн дарга зэрэг нийт 8 зорчигч, цэцэрлэгийн ажилтан, хүүхэд гээд нийт 18 хүн амь үрэгджээ. Тэдний дунд гурван хүүхэд амь үрэгдэж, 15 хүүхэд шархадсан байна. Ослын шалтгаан одоогоор тодорхойгүй байна.

Бровары хотод болсон ослын улмаас нийтдээ 18 хүн амь үрэгдэж, 29 хүн гэмтэж шархадсан байна. Украины цагдаагийн даргын мэдээлснээр амь үрэгдсэн хүний дунд тус улсын дотоод хэргийн сайд Денис Монастыркий, түүний орлогч Евгений Енин, тус яамны ТНБД Юрий Лубкович нар байсан байна. Украины цагдаа, аюулгүйн хүчнийхнийг хариуцдаг гол яамны сайд, 42 настай Денис Монастыркий дайн эхэлснээс хойш амиа алдсан Украины хамгийн өндөр албан тушаалтан болж байна.

Мэргэшсэн хуульч тэрээр 2021 оны 7-р сараас хойш Украины дотоод хэргийн яамны сайдаар ажиллажээ. Тэрээр ерөнхийлөгч Зеленскийгийн намын гол гишүүдийн нэг байсан юм. Оростой дайн хийж байгаа хүнд үед засгийн газрын гол хүмүүс амь үрэгдэнэ гэдэг Украины хувьд асар том цохилт боллоо гэж Аль жазира мэдээлжээ. Осол гэнэтийн осол байсан эсэхийг одоогоор нотлоогүй байна. Ослын газар өнөө өглөө манантай бүрхэг байсан нь осол болоход нөлөөлсөн байж болзошгүй гэсэн эхний дүгнэлт гарсан тухай орон нутгийн хэвлэлд мэдээлжээ.