ОХУ зэвсэгт хүчиндээ 2023-2026 он хүртэл томоохон өөрчлөлт хийхээр болжээ. Өрнөдийнхөн Украиныг зэвсэглэж байгаа нь армидаа шинэчлэлт хийхэд хүргэлээ гэж батлан хамгаалахын сайд Сергей Шойгу мэдэгдсэн байна. ОХУ энэхүү шинэчлэлтийн хүрээнд тэнгисийн цэрэг, агаар-сансрын болон стратегийн пуужингийн хүчнийхээ хүч чадавхыг бэхжүүлэхээс гадна 2026 он хүртэл цэрэг татлага явуулж, хүн хүчний тоог одоогийн 1.1 саяас 30 хувиар өсгөж, 1,5 саяд хүргэх юм байна.

Оросын Батлан хамгаалахын сайд Сергей Шойгу зэвсэгт хүчний гол бүтэц бүрэлдэхүүнийг бэхжүүлэх замаар Оросын нутаг дэвсгэрийн шинэ нэгж, чухал обьектуудыг хамгаалах боломжтой болно гэж зорилтоо тодорхойлж байна. Шойгугийн хувьд Украинд хийж байгаа дайны фронтоос Оросын арми ухрах хүртэл сул удирдсан гэж дотооддоо шүүмжлэлтэй тулгарч байгаа.

Тэрбээр саяны мэдэгдэлдээ: Эрх баригчдын зарласан цэргийн тусгай ажиллагааг ялалтад хүртэл үргэлжлүүлэх нь нэн тэргүүний зорилт болохыг тэмдэглэжээ. Кремлийн хэвлэлийн төлөөлөгч Өрнөдийнхөн Украиныг хүнд зэр зэвсгээр хангах замаар Украинд бохир дайн явуулж байхад, ийм өөрчлөлт хийх зайлшгүй шаардлагатай гэж мэдэгджээ. Оросын 1 сая хүнтэй зэвсэгт хүчин хүний тоогоор дэлхийд 5-д ордог, жилд ойролцоогоор 65,9 тэрбум доллар зарцуулж байна. 2021 оны байдлаар энэ нь тус улсын ДНБ-ий 4,3 хувьтай тэнцэж байна. Оросын эрх баригчид өнгөрсөн оны 2-р сарын 24-нд Украинд өөрсдийнх нь томьёолж байгаагаар цэргийн тусгай ажиллагаа эхлүүлснээс хойших 11 сарын хугацаанд Украины өмнөд болон зүүн нутагт их хэмжээний газар нутаг эзэлж авсан ч сүүлдээ хэд хэдэн удаа ухарч, армийн командлалдаа хэд хэдэн удаа халаа сэлгээ хийсэн.

Хамгийн сүүлд өнгөрсөн 7 хоногт зэвсэгт хүчний жанжин штабын дарга, Армийн генерал Валери Герасимовыг Украин дахь дайны ажиллагааны командлагчаар томилсон. Харин нөгөө талд Украины эрх баригчид Оросыг дайны гэмт хэрэг үйлдэж байна гэж буруутгаж байна. Учир нь Оросын арми дайны фронтоос алслагдмал хотод иргэний байгууламжид пуужингаар цохилт өгсөн нь дайны хугацаанд энгийн иргэд рүү халдсан хамгийн хөнөөлт халдлагын нэгд тооцогдож байна.