АНУ-ын зэвсэгт хүчин пуужингаас хамгаалах Пэтриот системийг ашиглах, ажиллуулах дадал олгохоор Украины цэргүүдийг сургаж эхэлсэн тухай тус улсын батлан хамгаалах яамнаас мэдэгджээ. Ойрын хэдэн сар Украины 100 орчим цэргийг Оклахома мужийн цэргийн баазад сургах юм байна. АНУ-д үйлдвэрлэсэн Пэтриот нь баллистик болон далавчит пуужин, нисэх онгоцыг замаас нь амдан устгах зориулалттай “газар-агаар” ангиллын хөдөлгөөнт пуужингийн систем юм.

АНУ Оросын пуужингийн довтолгооны эсрэг Украины агаараас хамгаалах тогтолцоог сайжруулах зорилгоор Киевд Пэтриот систем нийлүүлэхээр саяхан шийдвэрлэсэн юм. Өчигдөр Нидерландын батлан хамгаалах яам Днипрод бямба гарагт болсон пуужингийн цохилтод орон сууцны барилга өртөж олон хүн амь үрэгдсэнийг иш татан, Украинд Пэтриот систем нийлүүлэхэд бэлэн байгаагаа мэдэгджээ. Тодруулбал Нидерланд улс агаарын орон зайг хамгаалах Пэтриот системийг Украинд өгөх асуудлыг АНУ болон Германтай хэлэлцэж байгааг батлан хамгаалахын сайд нь твиттерт мэдээлсэн байна. Нидерландын ерөнхий сайд Марк Рютте мөн мягмар гарагт цагаан ордонд АНУ-ын ерөнхийлөгч Жозеф Байдентай уулзахдаа Америк, Германы адил Украинд пэтриот систем өгч, цэргүүдийг нь сургах боломжтой гэдгээ мэдэгдсэн байна.

Нидерланд нь Украинд батлан хамгаалахын тусламж үзүүлж байгаа гол дэмжигч орнуудын нэг. Тус улс энэ онд Украинд 2,7 тэрбум ам.долларын тусламж үзүүлэхээр амласан. Энэ хөрөнгийг цэргийн техник хэрэгсэл, хүмүүнлэгийн болон дипломат хүчин чармайлтыг дэмжихэд зарцуулах юм байна. Украины ерөнхийлөгч Зеленский Нидерландаас пэтриот системийн гурван нэгж баттерей нийлүүлэхээр болсныг мэдэгдэж байна. Украины агаарын цэргийн хүчин Днипрод Оросын талаас хөлөг онгоц эсэргүүцэгч пуужингаар цохилт өгсөн гэж мэдээлж байгаа. Мөн ийм төрлийн пуужинг зөвхөн газар агаар ангиллын пуужин эсэргүүцэгч Пэтриот систем л замаас амдаж устгаж чадна гэдгийг Украины талаас мэдэгдэж байна.