Харин ОХУ Өрнөдийнхөн байлдааны орчин үеийн танкаа Украин руу оруулбал Москватай хийж байгаа зөрчил даамжирч, НАТО энэ дайнд татагдан орох эрсдэлтэйг анхааруулсаар байна. Мөн Оросын арми дайны талбарт ялагдвал цөмийн дайн нүүрлэх эрсдэл байгааг Кремлийн эрх баригчид дахин анхаарууллаа. Орос Украинд цэргээ оруулах нэг үндэслэлийг НАТО-гийн өргөжин тэлэлт гэж тодорхойлсон. Тиймээс ч Украинтай хийж байгаа цэргийн тусгай ажиллагаанд нь НАТО-гийн зэвсэг, цаашлаад цэргийн хүч орж ирэх дээр тулвал тогтоон барих хүчээ ашиглахаа ч мэдэгдэж байсан юм.

Кремлийн хэвлэлийн төлөөлөгч Өрнөдийнхөн Киевийг танк болон бусад хүнд зэвсгээр хангалаа ч Москваг Украин дахь зорилгоо биелүүлэхэд нь саад болж чадаагүй гэж мэдэгджээ. Түүнчлэн хүнд зэвсэг нийлүүллээ ч дайны фронтод юуг ч өөрчлөхгүй, харин УКраины энгийн ард иргэд илүү хохирох эрсдэлтэйг Москва өрнөдийнхөнд хандаж анхааруулсаар байна. Мөн ОХУ-аас АНУ-д суугаа элчин сайд Антоли Антонов хэрвээ Украин Орос болон Крымын хойгт Өрнөдийн өндөр технологийн зэвсэг ашиглавал Орос хариуг нь барих болно гэж мэдэгджээ. Оросын хувьд 2014онд Украинаас Крымын хойгийг өөртөө нэгтгэж авсан, өнгөрсөн онд өөрсдийнх нь томьёолсон цэргийн тусгай ажиллагааны явцад Украины зүүн болон өмнөд бүсийн дөрвөн мужийг эзэлж, өөртөө нэгтгэх гэрээг тус мужийн засаг захиргаатай байгуулсан. Энэ бүс нутгийг алдахыг хүсэхгүй байгаа нь тодорхой байна. Украин болон өрнөдийнхөн ч дөрвөн мужийг Оросд нэгтгэгдэхийг хүлээн зөвшөөрөхгүй байгаа, энэ үүднээс дайнд Украиныг ялуулахын төлөө бүх талын дэмжлэг үзүүлсээр байна.

Үүний эсрэг ОХУ зогсох хүч байгаа гэдгээ ч удаа дараа мэдэгдсээр байна. нэгэнтээ газар нутгийн асуудал гол учиг шалтгаан болсон учир хэлэлцээний ширээнд ойрын үед суух эсэх нь их эргэлзээтэй байна. Одоо дайны талбарт гол давшилт,байлдаан Украины Запорожи муж,мөн Бахмут хотод өрнөж байна. Оросын арми дайны фронт дээр хэдэн сар тогтуун байсны эцэст сая запорожи мужид давшиж эхэлсэн байна. бямба гарагт Оросын батлан хамгаалах яам Донецк мужид хоёр ч чиглэлд ялалт байгуулсан тухайгаа мэдэгдсэн байна. харин Украины талаас уг мэдээллийг няцаасан байна.

Сүүлийн саруудад Оросын армийн дээд удирдлагад гарсан өөрчлөлт, цэрэг зэвсгийн хүч нөөцөө бэлтгэж байгаа байдал зэргээс үндэслэн өрнөдийнхөн Оросыг энэ хавар Украины дайнд өөр арга барилаар давших шинэ довтолгоо эхлүүлж болзошгүй гэж сэжиглэж байгаа. Сая Рамштайны уулзалтын өмнө өнгөрсөн 7хоногийн сүүлээр АНУ-ын тагнуулын төв газрын захирал Уилльям Бернс Киевд нууц айлчлал хийж, дайны байдал хаашаа чигтэй байгаа, Орос энэ хавар дайны фронтод ямар төлөвлөгөөтэй байгаа талаар, цаашид холбоотнууд ямар хариу арга хэмжээ авах талаар Украины эрх баригчидтай хэлэлцсэн тухай Вашингтон пост мэдээллээ. Рамштайнд холбоотнууд уулзаж, АНУ-ын тагнуулын газрын тэргүүн УКраинд нууцаар ирээд буцсан зэргээс үндэслэж шинжээчид Украины дайны байдалд энэ хавар өөр өнгө аяс харагдах вий, хэлэлцээний ширээнд суух боломж бололцоо бүр мухардалд орох вий гэж ихээхэн болгоомжилж, нөхцөл байдлыг анхааралтай ажиглаж байна.