Германы канцлер Олаф Шольц Украинд байлдааны хоёр төрлийн “Леопард” танк нийлүүлэхийг зөвшөөрчээ. Оросын дайралтын үр дүнтэй няцаахын тулд хүнд зэвсэглэл шаардлагатай гэж Киев мэдэгдэж Берлин хэдэн 7 хоногийн турш энэ талын хүчтэй шахалтад өртөөд байсны эцэст ийнхүү шийдвэрлэсэн талаар хэвлэлүүд мэдээлж байна. Үүнээс гадна Берлин Польш, Финланд зэрэг өөр бусад улсыг өөрийнх нь үйлдвэрийн танкийг Украинд дамжуулан экспортлох зөвшөөрөл өгсөн талаар германы хэвлэлүүд засгийн газрын нэрээ хэлээгүй эх сурвалжуудаас иш татан мэдээлжээ.

Германаас цэргийн зэвсэглэл худалдаж авдаг улс орнууд өөр бусад улс руу дахин экспортлохдоо Берлиний зөвшөөрлийг авах журам үйлчилдэг. Дээрх мэдээг анхлан нийтэлсэн “Шпигель” сэтгүүлд бичсэнээр, Герман улс өөрийн армийн зэвсгийн нөөцөөс “Леопард” танкийн хамгийн сүүлийн загварт багтдаг “2А6” загварын нэг рот иж бүрдлийг Украинд нийлүүлж магадгүй байна. Энэ нь ердийн жишгээр бол, наанадаж 14 танк гэсэн үг юм байна.

Гэхдээ энэ тухайд германы засгийн газраас одоогоор ямар нэг мэдээлэл хийгдээгүй байна. Германы тухайд Украины цэргийн хамгийн том хандивлагчдын нэг боловч танк илгээх тал дээр Германы олон нийт Зүүн Европ дахь дайнд Герман улс ийм маягаар улам гүнзгий татагдан орсноор хямрал улам даамжрахад түлхэц үзүүлж болзошгүй гэдэг болгоомжлол илэрхийлж байгаа юм.

Тиймдээ ч Германы засгийн газар Украинд хуягт тээвэрлэгчид, агаарын довтолгооноос хамгаалах болон пуужингаас эсэргүүцэн хамгаалах системүүд нийлүүлэхэд бэлэн байгаа ч довтолгооны зэвсэг болох "Леопард 2" байлдааны танкийг илгээх дургүй байсныг ажиглагчид энэ завсар сануулж байна. Үүнтэй зэрэгцээд АНУ-ын Ерөнхийлөгч Байдены засаг захиргаа мөн Украинд 30-аас доошгүй тооны “Абрамс Эм-1” танкийг илгээх төлөвлөгөөгөө зарлах төлөвтэй байгаа тухай мэдээлэлтэй байна. ОХУ-аас АНУ-д суугаа элчин сайд энэ мэдээг “бас нэг илэрхий өдөөн хатгалга” гэж нэрлэжээ. Киев харин, АНУ, Герман улсууд ийнхүү хэдэн сар хойшлуулсны эцэст танк нийлүүлэхээр болж байгаа нь тулааны талбарт өөрчлөлт авчирна гэж найдаж байгаагаа илэрхийлсэн байна.