Өнгөрсөн долоо хоногт Италийн Ром хотод бохирын шугам сүлжээ засварлах үеэр 2000 жилийн настай гэж таамаглаж байгаа эртний хөшөө олдсон байна. Тус хөшөө нь Ромын домогт баатар Геркулесийн хувцас өмссөн эрэгтэй хүнийг гантиг чулуугаар сийлсэн байжээ. Тус хөшөөг Ром хотын Аппиа Антика археологийн талбайн орчимд байрлах нийтийн цэцэрлэгт хүрээлэнд бохир усны хоолойг сэргээх ажлын үеэр олжээ.

Ромд малтлага хийх явцад ийм олдворууд маш их олддог ч ус, эрчим хүчний салбарт үйлчилгээ үзүүлдэг компани болох Ацеагийн ажилчид 10 метрийн газрын гүнд хэдэн долоо хоног ажиллахад ямар ч археологийн олдворын ул мөр байгаагүй хэрнээ гэнэтийн байдлаар энэ хөшөөг олсон нь гайхмаар байлаа гэж ярьсан байна. Археологичид тус хөшөөг эзэнт гүрний үеийнх байж магадгүй гэж дүгнэн, дүрслэгдсэн хүнийг хэн болох тухай таамаглалыг дэвшүүлж байгаа юм байна. Аппиа Антика археологийн цэцэрлэгт хүрээлэнд ажилладаг археологичдын нэг, археологич Франческа Романа Паолиллогийн хэлснээр хөшөөний онцлог шинж чанар нь МЭ 3-р зуунд амьдарч байсан Ромын эзэн хаан Дециусынхтай төстэй юм гэжээ.

Тэрээр мөн Энэ бол Геркулес биш харин Геркулесийн дүрээр дүрслэгдсэн өөр хүн юм. Гэхдээ энгийн хүмүүсийг ийнхүү Геркулесийн дүрээр илэрхийлдэггүй байсан учраас энэ нь язгууртан хаан хүн байж таарна. Ялангуяа арьс, саваа, далбаа зэргээс харахад хагас бурханы шинжийг агуулсан нь мөн дээрх таамгийг батлаж байна гэж хэмж хэлжээ. Энэхүү олдворыг Ромыг Бриндизи хоттой холбосон 650 км урт зам болох эртний Аппианы зам байсан газраас олсон юм байна. Энэ нь Ромчуудын барьж байсан хамгийн чухал замуудын нэгд тооцогддог байжээ.