АНУ-ын төрийн нарийн бичгийн дарга Энтони Блинкен Израиль, палестинчуудын хоорондын хямралыг намжаах зорилготой айлчлалынхаа хүрээнд мягмар гарагт Иордан голын баруун эрэгт очиж, Палестины удирдагч Махмуд Аббастай уулзжээ.

Өмнөх өдөр нь тэрээр Израилийн удирдагчидтай уулзсан юм. Блинкен палестины удирдагчтай уулзах үеэрээ, Ерөнхийлөгч Байдений засаг захиргаа “Хоёр улс, хоёр ард түмэн” зарчмыг хэрэгжүүлэхийн төлөө байгаа гэдгийг мэдэгдэж байжээ. Мөн тэрээр “Палестинчуудын хувьд одоо итгэл найдвар тэлэх бус, багасаж байгаа дүр зураг харагдаж байна. Тиймээс энэ байдал өөрчлөгдөх ёстой гэж бид итгэж байна” гэж мэдэгджээ. Аббас харин, “бид олон улсын хамтын нийгэмлэгийн тогтоол шийдвэрүүдийг тууштай баримталж, хүчирхийлэл, терроризмыг буруушаан, батлан гарын үсэг зурсан бүх гэрээ хэлцлийг сахин биелүүлж ирсэн" гэж мэдэгдээд, “Израилийн дур зоргоор авирлалуудыг” бүрэн зогсоохыг уриалсан байна. Өнгөрөгч долоо хоногт Израилийн цэргүүд Иордан голын баруун эрэг дэх дүрвэгсдийн хуаранд дайралт хийж, 10 хүний аминд хүрчээ. Палестины удирдагчид үүний хариуд хамтын аюулгүй байдлын гэрээнээс гарч байгаагаа мэдэгдсэн байна. Мөн дараа өдөр нь палестины буутай этгээд еврейн сүмийн гадаа халдлага үйлдэж, 7 хүний аминд хүрсэн хэрэг гарчээ. Улмаар израилийн эрх баригчид аюулгүйн хүчнүүдээ бэхжүүлж “алан хядагчдын үүр уурхай”-нуудын эсрэг арга хэмжээнд уриалж, улмаар халдлага үйлдсэн палестин иргэний гэрийг нураасан нь хоморголсон шийтгэл бөгөөд олон улсын хууль ёсонд харш гэж палестины удирдагчид мэдэгдэж байна. Америкийн төрийн нарийн бичгийн дарга айлчлалынхаа явцад хоёр талаас хамтын ажиллагааг сайжруулах тухайд “бүтээлч санаанууд” сонссоноо мэдэгдэж, тэдгээрийг бүс нутагт ажил хэрэг болгохын төлөө АНУ-ын дипломатчид ажиллах болно гэдгийг онцолжээ.