Турк, Сирийн газар нутгийг дамнасан 7,8 магниутын хүчтэй газар хөдлөлтийн уршгаар амиа алдсан хүний тоо 9600, гэмтэж бэртсэн хүний тоо 40 мянгад хүрсэн байна. Өнөөдрийн байдлаар Туркийн 10 муж, Сирийн хойд мужуудад хүмүүнлэгийн хямрал нүүрлэж байгааг олон улсын тусламжийн байгууллагууд анхааруулсаар байна. Орон нутгийн болон олон улсаас очиж байгаа аврагчид барилгын нуранги дор дарагдсан олон мянган хүнийг аврахын төлөө цаг агаарын хүнд хүнд нөхцөлд, цаг нартай уралдаж байна. Нурсан олон мянган барилгын нуранги дор олон хүн аврал ирж, аврах ажиллагааны хүч нөөц хүрэлцэхгүй байгаагаас хохирогчдын тоо цаашид өсөж магадгүйг тусламжийн байгууллагууд анхааруулжээ.

ДЭМБ хоёр улс дамнаж болсон энэхүү байгалийн гамшигт 23 сая хүн ямар нэгэн байдлаар өртөж байгаа гэсэн тооцоо гаргажээ. Турк улсын хувьд гамшгийн 4-р зэрэг тогтоож,олон улсаас тусламж хүлээж авч байна. Мөн гамшиг нүүрлэсэн 10 мужид 3 сарын хугацаатай онц байдал тогтоолоо. Туркийн дэд ерөнхийлөгчийн мэдээллээр газар хөдлөлтийн улмаас Турк улсад 7108 хүн амиа алдаж, 37011 хүн бэртгэж, 8000 мянган хүнийг аварсан байна. Зөвхөн Туркэд 5775 барилга нурсан, 380 мянган хүнийг түр хоргодох байр, зочид буудалд байрлуулсан байна. Онцгой байдлын дэглэмийн хүрээнд Анаталья хотод гамшигт өртсөн хүмүүсийг түр орогнуулах зочид буудлуудыг нээхээр болсон байна. Туркийн гамшгийн бүсэд 13 сая хүн байна. Туркийн өмнөд мужуудад цаг агаарын хэм хүйтэн байгаагаас аврах ажиллагаа хүнд нөхцөлд болж байгаагийн зэрэгцээ орон гэргүй болсон, аврагдсан хүмүүсийг байрлуулах, эмчлэхэд тун хүнд байгаа юм байна.

Мөн даваа гарагийн өглөөнөөс хойш тус бүсэд 100 гаруй удаа газар хөдлөлтийн чичиргээ мэдрэгджээ. Туркэд аврах ажиллагаанд дотоод гадаадын нийт 79100 гаруй хүний бүрэлдэхүүнтэй аврах багууд ажиллаж байгаа юм байна. Туркийн зэвсэгт хүчин гамшгийн бүс рүү тусламжийг шуурхай хүргэх үүднээс агаарын орон зай гаргаж, түргэн тусламжийн онгоцууд уг агаарын зайг ашиглаж байна.

БНТУ-ын ерөнхийлөгч Режеп Тайип Эрдоган: “Газар хөдлөлт болсон 10 мужийг “нийтийн амьдралд нөлөөлсөн гамшгийн бүс” гэж зарлаж байна. Үндсэн хуулийн 119 дүгээр зүйлд заасны дагуу бид эрэн хайх, аврах ажиллагааг шуурхай явуулах үүднээс онцгой байдлын дэглэм тогтоож байна. Энэ дагуу гурван сарын хугацаанд гамшгийн бүсэд шаардлагатай ерөнхийлөгч болон парламентаас гарах шийдвэрийг түргэн шуурхай гаргаж ажиллах юм.”

БНТУ-ын дэд ерөнхийлөгч Фуат Октай: “Манай аврагчидтай олон улсын аврах багийнхан нэгдэж, хамтран ажиллаж байна. мөн манай улсын бүх яамд, цагдаа цэргийн холбогдох нэгжүүд, төрийн бус байгууллагуудын төлөөлөл, эмч мэргэжилтнүүд гээд 70 гаруй мянган хүн гамшгийн бүсэд аврах ажиллагаанд оролцож байна. Үүний зэрэгцээ гал түймэр унтраахад тэнгисийн хүчнийхнээ дайчиллаа. Бидэнд нөөц байгаа, шалыг унтрааж чадна гэж найдаж байна. ”Дэлхийн 70 гаруй орон, олон улсын байгууллагуудаас мөнгө санхүү, тоног төхөөрөмж, дулаан хувцас, хоол хүнс, эм тариа, хүн хүч гээд тал бүрийн тусламж илгээхээ амласнаас 20 орчмын аврах баг очиж аврах ажиллагаанд оролцож байгаа юм байна. Турк улс НАТО-гийн гол гишүүдийн нэг. Энэ үүднээс НАТО газар хөдлөлтийн мэргэжилтэн, шинжээч, аврагчид, эмч сувилагч бүхий 1400 хүний бүрэлдэхүүнтэй аврах багаа Турк рүү илгээж байна. Туркийн ерөнхийлөгч гамшгийн голомтот бүсэд очиж нөхцөл байдалтай танилцахаар төлөвлөж байна.