Газар хөдлөлт болсон Сирийн бүс нутаг Сирийн засгийн газар болон сөрөг хүчний босогчид хооронд хуваагдсан дайнтай бүс нутаг. Тэнд 4 сая гаруй хүн хүмүүнлэгийн тусламжаас хараатай байдалд байгаа, үүн дээр байгалийн гамшиг нүүрлэчихээр нөхцөл байдал хүмүүнлэгийн гамшиг нүүрлэх нь гэж олон улсын байгууллагууд санаа зовниж байна. Гэхдээ НҮБ-ын тусламжийн байгууллагууд бололцоотой бүх аргаар Сирийн ард түмэнд тусламж хүргэхээр ажиллаж байгаагаа мэдээлжээ. Сирийн иргэний хамгааллын цагаан дуулгатнууд байгууллагаас өгсөн мэдээллээр газар хөдлөлт болсон, босогчдын мэдэлд байгаа бүс нутагт 2530 хүн амиа алдаж, 2600 орчим хүн гэмтэж бэртсэн, нуранги дор олон зуун хүн байгаа учир хохирогсдын тоо өсөх төлөвтэй байгаа юм байна.

Мөн тэнд 400 гаруй барилга бүрэн нурж, 1300 гаруй барилга хэсэгчлэн сүйджээ. Сирид хил хязгааргүй эмч нар байгууллагын 500 ажилтан болон гэр бүлийн хүмүүсээ алдсан иргэд аврах ажиллагаанд оролцож байгаа юм байна. Байгалийн гамшгаас болж НҮБ-аас Сири рүү оруулах тусламжийн шугам түр хаагдахад хүрч, дайнд нэрвэгдсэн Сирийн эмнэлгүүд ачааллаа дийлэхгүй болсон байна. нөгөө талаар Сирийн засгийн газар зөвхөн нэг хилийн боомтоор гамшгийн бүс рүү тусламж оруулахыг зөвшөөрч байгаагаас гамшгийн бүсэд дарагдсан олон хүнд аврах тусламж хүрч чадахгүй цаг алдах вий гэсэн болгоомжлол байна. Орос, Ирак, Арабын нэгдсэн Эмирт, Алжир зэрэг улсууд Сирид яаралтай тусламж хүргэсэн бол Израйл, Хятад зэрэг улсууд Сирид тусламж үзүүлэхээ амлаж, зарим нь тус улс руу тусламжаа илгээж байгаа юм байна. НҮБ-аас Турк, Сирийн гамшгийн бүсэд туслалцаа үзүүлэхэд 25 сая ам.долларын санхүүжилт гаргаж байгаа юм байна. АНУ Сирийн төрийн бус байгууллагуудаар дамжуулж тусламж үзүүлж байгаа юм байна.

Сири улс 2011 оноос хойш иргэний дайнтай байгаа. Дайны хугацаанд хүний эрх зөрчсөн, террор үйл ажиллагаа явуулсан шалтгаанаар эдийн засгийн хоригтой байгаа юм. НҮБ-ын мэдээгээр газар хөдлөлтөөс өмнө Сирийн хүн амын 70 хувьд нь хүмүүнлэгийн тусламж шаардлагатай байсан. Иймээс энэ гамшиг Сирийн хүмүүнлэгийн хямралыг улам даамжруулах төлөвтэй байна. Энэ хүнд нөхцөлд хоригоо цуцлах нь хүний ёсонд нийцнэ гэж Сирийн улаан загалмайн нийгэмлэгээс өрнөдийн орнуудад уриалжээ.