Украины ерөнхийлөгч Володимир Зеленский Оросын хүчнийхний эсрэг тэмцэлд нь сөнөөгч нисэх онгоцуудаар туслах шаардлагаа илэрхийлэхээр Их Британи, Франц улсуудад айлчлал хийж байна. Оросын Украин дахь цэрэг дайны ажиллагаа эхэлсээр жил орчмын хугацаанд хоёр дахь гадаад айлчлалаа Зеленский өчигдөр Лондонд хийсэн байна. Энэ үеэр тэр Британий өмнөх Ерөнхий сайд нарт уриалж байсны адилаар Риши Сунакийг ч бас зэвсгийн тусламжаа өргөжүүлэхийг уриалжээ.

Сунак харин Британийн нисгэгчид Украины мэргэжил нэгтнүүддээ НАТО-гийн байлдааны онгоцуудыг хэрхэн жолоодохыг зааж сургах болно гэдгийг мэдэгдэж, сөнөөгч онгоцууд илгээх Зеленскийн хүсэлтэд татгалзжээ. Сунак “Яриа тохирооноос хальсан зүйл байхгүй. Энэ нь бид эцсийн дүндээ, Украины ерөнхийлөгч болоод ард түмнийг Оросын түрэмгийллийн эсрэг ялуулахын төлөө шийдвэр төгс байгаагийнх” гэж мэдэгджээ. Үүний зэрэгцээ засгийн газар нь урт хугацаандаа байлдааны онгоцууд нийлүүлэх боломжтой эсэхийг судлахыг ерөнхий сайд Сунак батлан хамгаалахын сайддаа даалгасан гэдэг мэдээллийг төлөөлөгч нь өгсөн байна.

Ийм нийлүүлэлт хийх нөхцөлд “Европ тив төдийгүй дэлхий дахинд цэрэг, улс төрийн үр дагаврууд нүүрлэнэ” гэж Оросын дипломатчид анхааруулж байгаа юм. Зеленский Их Британий дараа Парист хүрэлцэн очиж, Ерөнхийлөгч Эммануэль Макрон, Германы канцлер Олаф Шольц нартай хэлэлцээ хийлээ. Энэ үеэр ерөнхийлөгч Макрон Франц улс Киевийг тууштай дэмжихийг нотлон илэрхийлж, “Украин улс дайнд ялж гарахын тулд Франц болон европын түншүүддээ, тэдний холбоотнуудад найдаж болно” гэж мэдэгджээ. Тэндээсээ тэрээр Брюссельд очиж, Европын Холбооны дээд хэмжээний уулзалтад оролцож магадгүй байна.