Украины ерөнхийлөгч Володимир Зеленскийн Европт хийж байгаа айлчлал Брюссельд хотноо Европын холбооны дээд хэмжээний уулзалтад оролцсоноор үргэлжилж байна.

Мөн тэрбээр Европын парламентад үг хэллээ. Украины ерөнхийлөгч энд хэлсэн үгэндээ, Оросын түрэмгийллийг сөрөхөд нь дэмжлэг үзүүлж байгаад европчуудад талархлаа илэрхийлсний зэрэгцээ Украин улс ялалт байгуулах хүртлээ тэмцэх болно гэж мэдэгджээ.

Украиныг Европын холбоонд элсүүлэхийг Зеленский өөрийн гол зорилгоо гэж мэдэгдээд, Европ болон түүний эрх чөлөөт амьдралын хэв маягт дарангуйлал заналхийлж байна гэжээ.

Харин Европын парламентын дарга Роберта Мецола энэ үеэр, Украин улс европын үнэт зүйлсийн төлөө тэмцэж байгааг цохон дурдаад, Европын холбооны улсууд эрх чөлөөгөө сахин хамгаалахад нь Украинд шаардлагатай байгаа байлдааны онгоцнуудыг нийлүүлэх асуудлыг хурдан авч хэлэлцэх ёстой гэсэн байна.

Үүний өмнө Зеленский лхагва гарагт Парист айлчилж, Францын ерөнхийлөгч Эммануэль Макрон, Германы канцлер Олаф Шольц нарт сөнөөгч нисэх онгоцнууд нийлүүлэх хүсэлтээ биечлэн тавьсан байна. Хоёр удирдагч хоёул энэ үеэр Киевийг үргэлжлүүлэн дэмжихээ амлаж байжээ.

Үүний өмнө нь Зеленский украины нисгэгчдийг НАТО-гийн тэргүүлэх загварын сөнөөгч нисэх онгоцнууд дээр ажиллахад сургаж бэлтгэнэ гэдэг амлалтыг Их Британиас авч чадсан юм. Дайн эхэлснээс хойших хоёр дахь гадаад айлчлалынхаа хүрээнд Зеленский Лондонд ерөнхий сайд Сунак, хаан 3 дугаар Чарльз нарт бараалхаж, дараа нь Парист Франц, Германы удирдагчидтай уулзсан байна.

Франц улс Украинд ялалт байгуулахад нь, хууль ёсны эрхээ сэргээхэд нь туслахын төлөө байр суурьтай байгаа гэдгийг Францын ерөнхийлөгчМакрон  уулзалтын үеэр нотлон мэдэгдэж,  Киевт зэвсэг илгээх “хүчин чармайлтаа” мөн үргэлжлүүлэхийг хэлсэн.

Зеленский Британийн парламентад үг хэлэхдээ, байлдааны нисэх онгоцнуудыг “эрх чөлөөний даль жигүүр” хэмээн, улсад нь нийлүүлэх уриалгаа цохон илэрхийлжээ. Украины талаас өрнөдийн сөнөөгч нисэх онгоцнуудыг авах шаардлагатай байгаа талаар нэлээд дээрээс илэрхийлж байгаа.

Өрнөдийн орнууд өнөөдрийг хүртэл Украины зэвсэгт хүчинд нисэх онгоцууд зэрэг Оросын нутгийн гүнд цохилт өгөх чадалтай бусад зэвсэг нийлүүлээгүй байгаа юм. АНУ-ын Ерөнхийлөгч Жо Байден гэхэд өнгөрөгч сард, Вашингтон Украинд “Ф-16” онгоцнууд өгөхгүй гэж мэдэгдсэн бол, британийн албаныхан ийм онгоцнуудыг эзэмшиж сурахад урт хугацааны бэлтгэл сургалт шаардлагатай гэж мэдэгдэж байсан.

Харин Франц, Польшийн тухайд, Өрнөдийн хамтын шийдвэрийн хүрээнд өөрсдөд байгаа онгоцнуудыг илгээх боломжийг авч үзсэн цөөн орны тоонд багтаж байгаа юм. Энэ зуур Их Британи дахь ОХУ-ын ЭСЯ Лондоныг Украинд сөнөөгч нисэх онгоцнууд илгээхээс сэрэмжлүүлж, ийм алхам дэлхий дахинд сөрөг үр дагавар дагуулна гэж мэдэгдсэнийг ТАСС уламжиллаа.

Мөн сүүлийн үед нэлээд эрчимтэй яригдаж байсан Оросын цэргийн давшилт Украины Луганск мужийн баруун талын Сватово-Кременная шугамын дагуу эхэллээ гэдэг байр суурийг Вашингтоны Дайны судалгааны хүрээлэн нийтлүүлжээ.