Шууд Chart

АНУ, Канадын цэргийнхэн үл танигдах нисдэг биетийг буудаж унагажээ

2023-02-12 15:11:33

Канадын Ерөнхий сайд Жастин Трюдо улсынх нь агаарын орон зайд нэвтэрсэн үл танигдах нисдэг биетийг буудаж унагасан болохыг нотоллоо. Канад болон АНУ цэргийн онгоцуудаа хөөргөж, АНУ-ын F-22 онгоцноос нисэгч биетийг буудан унагалаа” гэж Трюдо өөрийн Твиттер хуудсанд мэдээлжээ.
Мөн Канадын хүчнийхэн уг нисэгч биетийн хэсгүүдийг олж шинжлэх болно гэдгийг тэрээр дурдсан байна.

Канадын БХЯ-ны сайд Анита Ананд мөн бямба гарагт АНУ, Канадын агаарын орон зайг батлан хамгаалдаг НОРАД байгууллагын явуулсан энэ ажиллагааны талаар мэдээлэл хийж, канадын хамгийн баруун талын Юкон мужийн нутаг дээгүүр 13000 метрийн өндөр нисэж байсан үл танигдах нисэгч биетийг буудаж унагасан тухайд тайлбар мэдээлэл хийжээ. АНУ-ын БХЯ мөн мэдээллийг нотолж, Аляскийн Анкориж дахь цэргийн баазаас хоёр “Эф-22” сөнөөгч онгоц хөөрч, биетийг “Эй-Ай-Эм-9Икс” пуужингаар буудан унагасан гэдгийг тодруулж мэдээлжээ.

Пентагоны хэвлэлийн төлөөлөгч, бригадын генерал Пэт Райдер, тухайн нисэгч биетийг шалгах ажилд Холбооны мөрдөх товчоо Канадын цагдаагийн газартай нягт хамтран ажиллах болно гэж мэдэгдсэн байна. Үүний өмнө баасан гарагт АНУ-ын хүчнийхэн Аляска мужийн хойд хэсэг дэх АНУ-ын усан орон зай дээгүүр нисэж байсан өөр нэг нисэгч биетийг буудан унагажээ. Энэ сарын эхээр АНУ-ын Өмнөд Каролина муж улсын эрэг хавьд Хятадын тагнуулын бөмбөлгийг америкийн сөнөөгч нисэх онгоцоос буудаж унагасан юм. Сүүлд унагасан нисэгч биетийн тухайд ямар учиртай нь ойлгомжгүй байгааг мэргэжилтнүүд тэмдэглэж байна. АНУ хятадын тагнуулын байж болзошгүй бөмбөлгийг унагаснаас 7 хоногийн дараа уг биет Хойд Америкийн нутаг дээр гарч иржээ.

Нийтэлсэн: Moнголын мэдээ

АНУ, Канадын цэргийнхэн үл танигдах нисдэг биетийг буудаж унагажээ   
Үзсэн: 522 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй