Сири, Туркийн нутгийг дамнасан гамшигт газар хөдлөлтөөс хойш 6 хоног өнгөрч, хүмүүс амьд мэнд аврагдах найдвар бүдгэрсээр байна. Гэлээ ч аврагчид бямба гарагт нуранги дороос хэд хэдэн хүнийг гаргаж чадлаа. Энэ зуур Турк болон Сирид амь үрэгдэгсдийн тоо 28,000-с давсан давсан тухай Би-Би-Си мэдээлсэн байна.

Өнгөрөгч даваа гарагт болсон 7,8 магнитудын газар хөдлөлтөөр Туркт 1939 оноос хойш үзэгдээгүй хамгийн их хохирол гамшиг учраад байна. “Аль-Жазира”-гийн сурвалжлагч үлэмж хэмжээний эвдрэл сүйдэл учирсан Туркийн Хатай мужийн төв Антаки хотод газар хөдлөлтөөс хойш 132 дахь цаг дээр 8 настай охиныг аварч чадсан бол, үүнээс хэдэн цагийн өмнө эрэгтэй, эмэгтэй 2 хүнийг эсэн мэнд гаргасныг мэдээлж, найдвар бүрэн тасраагүй аврагчид эрлээ үргэлжлүүлж байгааг мэдээлжээ.

Тэрээр мөн, ойрын нэг хоногт багтааж хотын нисэх буудлыг ажилд оруулахаар ажиллаж байгааг дурдсан байна. Газар хөдлөлтийн болон хариу арга хэмжээний төлөвлөлтийн асуудлуудтай тулгарч байгаа Туркийн ерөнхийлөгч Рэжеп Таип Эрдоган эрх баригчид илүү шуурхай ажиллах ёстой байсныг хүлээн зөвшөөрсөн м. Үүний зэрэгцээ Туркийн өмнөд мужуудад дээрэм тонуул газар ихсэж аврах ажиллагаанд бэрхшээл учруулж эхэлжээ. Ерөнхийлөгч Эрдоган хууль зөрчигчдөд хатуу арга хэмжээ авах болно гэж мэдэгдсэн байна. “Бид онц байдал зарласан. Энэ бол дээрэм тонуул хийж, хүн хулгайлсан этгээдүүдийн нуруун дээр төрийн хатуу нударга буух болно гэсэн үг” гэж Эрдоган гамшгийн бүсэд ажиллах үеэрээ мэдэгджээ. Одоогийн байдлаар, Туркийн эрх баригчид дээрэм тонуул хийсэн 50 хүнийг 8 мужид баривчилж хориод байгаа юм байна. Тэднээс хэд хэдэн буу хураажээ. Үл мэдэгдэх бүлгүүдийн хооронд мөргөлдөөн гарсны учир германы болон австрийн аврах бүлгүүд бямба гарагт хэсэг зуур ажлаа зогсооход хүрчээ.

Энэ зуур бямба гарагт туркийн Караманмараш мужид ажилласан НҮБ-ын хүмүүнлэгийн тусламжийн асуудал эрхэлсэн тэргүүн Мартин Гриффитс “энэ удаагийн газар хөдлөлтийг "сүүлийн 100 жилд бүс нутагт тохиосон хамгийн хүнд үйл явдал” гэж нэрлэжээ. Мөн энд одоогийн байдлаар, 100 гаруй улсын аврах туслах багууд ажиллаж байгаа ч, дахиад ч илгээх шаардлага байсаар байгааг” дурджээ.

Мөн тэрээр байгалийн гамшгийн үед бүс нутгийн зөрчил сөргөлдөөний бодлогоо хойш тавихыг уриалж, энэ талын сайн жишээ хэдийнэ ил болсныг дурдсан байна. Тусламжийн цуваа нэвтрүүлэхийн тулд өчигдөр Турк, Арменийн дундах хилийн боомт сүүлийн 35 жилийн түүхэнд анх удаа нээгджээ.