Турк болон хөрш зэргэлдээ Сирийн нутагт болсон цуврал газар хөдлөлтийн улмаас амь эрсэдсэн хүний тоо 33 мянга давжээ. Түрүү 7 хоногийн даваа гарагийн үүрээр 7,8 магнитудын газар хөдлөлт болж, түүнээс үүдэлтэй чичирхийллүүд өнөө хэр үргэлжилж байна. Туркийн өмнө зүгийн 10 хотод олон мянган байшин нурж, Сирийн хойд хилийн дагуух олон тосгон суурин мөн газрын хөрстэй тэгшлэгджээ.

Туркт амиа алдсан хүмүүсийн тоо 29605 болсныг мэдээлж байгаа бол, Сирид 3581 хүний амь эрсэдсэн нь тогтоогджээ. Үүний зэрэгцээ нурсан барилга байшингуудын дор гацсан олон хүн амьд байж магадгүй гэдэг найдвар тээн эрэн хайх аврах ажлыг үргэлжлүүлсээр байна. Газар хөдлөлтөд хамгийн хүндээр нэрвэгдсэн газрын нэг Туркийн өмнө зүгийн Караманмараш мужид Япон болон бусад улсын аврагчид барилгын нурангиудыг нэгжиж шалгаж байна. Ням гарагт 7 давхар барилгын нуранги дороос нэг охин эсэн мэнд олдсоныг онцгой байдлын аврагчид “гайхамшиг” хэмээн шагшиж байна. Мөн ням гарагт буюу газар бүтэн 6 хоногийн дараа Антакья хотод 23 настай залууг аварч чаджээ. Сүүлийн олон арван жилд үзэгдээгүй их гамшиг хохирол тарьсан газар хөдлөлт болоод удаагүй байхад Истанбул хотын оршин суугчид дараагийн хүчтэй газар хөдлөлт хотыг нь нэрвэж магадгүй гэдэг айдастай байна. Истанбулын Илдыз техникийн их сургуулийн геологийн профессор Сукру Эрсой-н үзэж байгаагаар, Истанбулд газар хөдлөх эсэхийг бус, харин хэзээ хөдлөх вэ гэж ярих нь оновчтой байна. “Урьд өмнөх газар хөдлөлтүүдийн тухай бидэнд байгаа мэдээ баримтууд, зарим тодорхой загварчлалын үндсэн дээр Истанбулд газар хөдлөхөд ойрхон гэдгийг бид хэлж чадах байна.

Гэхдээ яг хэзээ болохыг урьдчилж мэдэх аргагүй учраас өнөөдөр ч ийм гамшиг тохиолдохыг үгүйсгэхгүй” гэж энэ профессор Аль-Жазира-д ярьжээ. Истанбул хотын дарга Икрем Имамоглу саяхны нэг ярилцлагадаа, 16 сая шахам хүн амтай хотод нь газар хөдлөлт тэсвэрлэх чадамжгүй 90 мянгаад байшин байгааг ярьж байсан байна. Өөр 170 мянгаад байшин дундаж эрсдэлтэйд тооцогдож байгаа мэдээг тэрээр Истанбулын захиргаанаас явуулсан судалгаанд тулгуурлан мэдээлж байжээ. Хэд хэдэн тектоник хавтангийн залгаас дээр байршилтай Турк улс газар хөдлөлтийн өндөр эрсдэлтэй бүсэд багтдаг. Еврази болон Анатолийн хавтанг заагладаг Хойд Анатолийн хагарал Истанбулаас холгүй өнгөрдөг байна.